Навіна пра тое, што Юрась Алейнік паедзе вучыцца ў Маскву, стала шокам і для самаго Юрася - пра гэта выключаны з Акадэміі кіраваньня студэнт даведаўся праз Інтэрнэт. Але Юрась разглядае і такі варыянт. Усё будзе залежыць ад умоваў, якія прапануе Вышэйшая школа эканомікі. Тым часам, заўтра адбудзецца чарговае судовае паседжаньне па справе Алейніка.

6 жніўня Менскі гарадзкі суд скасаваў рашэньне суду Кастрычніцкага раёну сталіцы, дзе адмовіліся разглядаць прыватную скаргу Юрася Алейніка. Такім чынам, справа адлічанага студэнта Акадэміі кіраваньня пры Прэзыдэнце не зачынена.

Студэнт чацьвертага курса Юрась Алейнік быў адлічаны па загаду ад 15 траўня дэканам Факультэта дзяржаўнага кіраваньня і эканомікі Акадэміі кіраваньня пры Прэзыдэнце Рэспублікі Беларусь. Судовая скарга студэнта стала адным зь нешматлікіх прэцэдэнтаў абароны правоў адлічаных студэнтаў.