Сьцяна Цоя будзе адноўленая насупраць КЗ «Мінск» «пасьля наступленьня спрыяльных пагодных умоваў». Вяртаньня сьцяны дамагліся грамадзкія актывісты праз збор подпісаў.

Кінастудыя «Беларусьфільм» зьбіраецца зьняць кінавэрсію рамана Ўладзіміра Караткевіча «Каласы пад сярпом тваім». Плянуецца, што фільмам зоймецца галоўны рэжысёр Купалаўскага тэатру Мікалай Пінігін, а стужка атрымае статус «нацыянальнага кінапраекту».

Восем беларускіх ВНУ з гэтага году адчыняюць набор на новыя спэцыяльнасьці. У агульнадзяржаўны клясыфікатар «Спэцыяльнасьці й кваліфікацыі» цяпер дадалося яшчэ дзьве спэцыяльнасьці, навучаньне па якіх яшчэ не вялося ні ў воднай ВНУ краіны.

У сакавіку-траўні пройдуць бясплатныя паказы польскіх, украінскіх і нямецкіх фільмаў у межах кінаклюбу «Кадр», арганізаваныя Інстытутам Гётэ, Культурніцка-інфармацыйным цэнтрам пры амбасадзе Ўкраіны і Польскім Інстытутам. У праграме заплянавана 5 стужак розных гадоў: ад 60-х і па сёньня, адзначаных прэстыжнымі ўзнагародамі.

Арганізатары музычнага фэстывалю Be2gether, што чацьверты раз пройдзе 25–27 чэрвеня ў літоўскіх Нарвілішках на мяжы зь Беларусьсю, абвясьцілі пра пошук валянтэраў. Беларусы могуць падаваць анкеты да 8 красавіка. Таксама арганізатары назвалі кошт квіткоў на фэст.

Застаецца менш за адзін тыдзень да заканчэньня прыёму працаў (да 15 сакавіка 2010 году) на конкурс для фатографаў і фотакарэспандэнтаў «Прэс-фота Беларусі».

У клюбе «Рэактар» завершылася 14-я цырымонія ўручэньня ўзнагародаў лепшым музыкам Беларусі па выніках мінулага году ў сфэры альтэрнатыўнай музыкі «Рок-Каранацыя»-2009. 15 крыштальных каронаў знайшлі сваіх уладальнікаў: тры кароны ў «Безь Білета», рок-князёўна — Наста Шпакоўская («Naka»), выканаўца году — Зьміцер Вайцюшкевіч — сьпіс пераможцаў на Generation.bY.

Новы сольны праект «Белая яблыня грому» на вершы беларускіх клясыкаў Лявон Вольскі задумаў яшчэ 7 год таму.

«Неяк амаль выпадкова мне патрапіў у рукі зборнік вершаў Багушэвіча. Я пачытаў і зразумеў — гэта ж сапраўдны гангста-рэп!» — распавядае Лявон.

Прэзэнтацыя дыску, у які ўвайшлі 12 песень на вершы розных беларускіх паэтаў XIX–XX стагодзьдзяў, пройдзе 23 сакавіка ў тэатры імя Янкі Купалы.

Навукоўцы высьветлілі, што нядаўні землятрус у Чылі, які прынёс шматлікія ахвяры, зрушыў зямную вось на 8 сантымэтраў і скараціў суткі на 1.26 мільённая долі сэкунды.

Назоў кружэлкі лягічна вынікае са зьместу: «3» — гэта тры песьні і тры ўдзельніка. «Трэцім» у дуэт паэта і вулічнага музыканта Міхея Насарогава і вядомага беларускага кліпмэйкера Макса Сірага далучыўся менскі бубнач Арцём Залескі («Серебряная Свадьба», «Gurzuf»). Песьні даступныя для вольнага спампоўваньня!