За жахлівымі падзеямі вечару 11 красавіка іншая важная навіна сышла ў цень, магчыма, самая істотная для беларускага Інтэрнэту з часу яго ўзьнікненьня. Упершыню афіцыйна беларускія ўлады прызналі, што распачалі блакіроўку двух навінавых сайтаў. Пакуль гаворыцца толькі пра два сайты і толькі ў дзяржаўных установах. Мы прааналізавалі практыку абмежаваньня доступу да «нязручных» сайтаў, што ўласьцівая для аўтарытарных рэжымаў па ўсім сьвеце, каб уявіць, куды за перайманьнем досьведу накіроўваюць сваіх «спэцыялістаў» беларускія hi-tech-цэнзары.

У буйнейшым у краіне IT-унівэрсытэце адкрыўся студэнцкі бізнэс-інкубатар. Паводле яго стваральнікаў, гэта першая творчая пляцоўка для студэнтаў, якая дазволіць ім знайсьці парады і грошы на ўласныя «сьмелыя ідэі», а цяперашнім бізнэсмэнам — падрыхтаваць сваю зьмену і «будучае пакаленьне інтэлектуальнай эліты». Вырошчваць нашых Джобсаў і Цукербергаў будуць пры маральнай і грашовай падтрымцы беларускага Парку высокіх тэхналёгій і ІТ-прадпрымальнікаў. На адкрыцьці інкубатару пабываў адзін з галоўных мэдыягерояў мінулага тыдня — дырэктар Парку высокіх тэхналёгіяў Валеры Цэпкала.

Беларускі і кубінскі ўнівэрсытэты будуць абменьвацца студэнтамі, выкладчыкамі, навучальнай літаратурай, ладзіць супольныя канфэрэнцыі, сэмінары і іншыя мерапрыемствы. Дамова падпісаная ў часе вандроўкі нядаўна прызначанага рэктара БДУ прафэсара Сяргея Абламейкі на Кубу.