Эўратур папяровых Ляпісаў: ад Жданоў да Барсэлёны

Абраныя найлепшыя працы ў межах конкурсу ў працяг праекту Freedom on paper: канцэрт Ляпісаў. Дзякуючы нашым чытачам забаронены ў Беларусі гурт «Ляпіс Трубяцкой» выступіў ня толькі ў літоўскай Клайпедзе і пад польскім Кракавам, але нават у Барсэлёне і на менскіх Ждановічах. Аўтары самых цікавых здымкаў «Ляпісаў» атрымаюць магчымасьць наведаць бліжэйшы канцэрт гурта ў Вільні.

Два тыдні таму Generation.bY абвясьціў конкурс на лепшыя здымкі папяровых выяваў ўдзельнікаў гурту «Ляпіс Трубяцкой». Мы чакалі фота папяровых «Ляпісаў» на плошчах, у сквэрах ці іншых цікавых публічных і ня вельмі месцах вашых гарадоў і мястэчкаў.

Як тое бывае звычайна ў падвядзеньні вынікаў творчых конкурсах — было складана выбіраць сярод усіх выдатных працаў. Але вось такі атрымаўся выніковы сьпіс пераможцаў.

Усе пераможцы атрымаюць квіткі на канцэрт «Ляпіса Трубяцкога» ў Вільні, які адбудзецца 14 траўня пры падтрымцы Эўрапейскага гуманітарнага ўнівэрсытэту, згуртаваньня беларусаў сьвету «Бацькаўшчына», грамадзка-культурніцкай кампаніі «Будзьма беларусамі» і «Belarus Watch».

Болей здымкаў з Эўратуру папяровага «Ляпіса Трубяцкога» глядзім у фотаблогу

Працягнуць прыгоды папяровых музыкаў, якім забаранілі выступы ў Беларусі, можна ў любы час: зыходнікі да выяваў «Ляпісаў» па шматлікіх просьбах мы выклалі ў вольны доступ (спампаваць). Самыя цікавыя фотазнаходкі дасылайце нам на team@generation.by. А пачалося ўсё з «Бел-чырвона-белага на вуліцах Менску» і «Канцэртаў забароненых гуртоў на буйнейшых пляцоўках гораду».