Старшыня дзяржкантролю Аляксандр Якабсон прапанаваў засяліць у пустыя пакоі ў інтэрнатах ПТВ студэнтаў унівэрсытэтаў. Паводле ягоных словаў, у такіх будынках дастаткова вольных месцаў, асабліва калі пазбавіцца ад «чужых грамадзян».

Дзяржава ў асобе Камітэту дзяржкантролю спрабуе разабрацца ў тым, што цяпер адбываецца ў студэнцкіх інтэрнатах. За некалькі дзён праверак і тэлефонных ліній высьветлілася, што ў некаторых інтэрнатах дагэтуль няма ацяпленьня, а ў іншых замест студэнтаў жывуць банкіры і будаўнікі.

У магілёўскім філіяле Інстытуту правазнаўства са студэнтаў бралі грошы за пропускі практычных заняткаў. Камітэт дзяржаўнага кантролю палічыў такі «падатак» неабгрунтаваным, але толькі таму, што права інстытуту браць грошы за пропускі не было адзначанае ў дамове на навучаньне.