Год таму абставіны 11 красавіка склаліся так, што мне давялося стацца сьведкам чалавечага болю, страху й разгубленасьці. Упершыню мне давялося адчуць жах адчаю.

Ад выбуху ў менскім мэтро пацярпелі прыкладна 15 студэнтаў, ёсьць таксама настаўнікі і пэдагогі. Паводле міністра адукацыі, у сувязі з тэрактам адмененыя ўсе масавыя мерапрыемствы ў ВНУ, а ва ўсіх установах адукацыі ўзмоцненыя меры бясьпекі.

МТС заявіў, што ў першыя гадзіны пасьля тэракту ў Менску абанэнты рабілі на 50% болей званкоў, чым звычайна. Ня гледзячы на намаганьні спэцыялістаў, адразу справіцца з такой нагрузкай не атрымалася: у Менску былі збоі з сувязьзю. Адначасова апэратар life:) паабяцаў вярнуць грошы за ўсе адасланыя SMS у ноч пасьля тэракту.

Выбух у менскім мэтро стаў шокам для Беларусі, які на некаторы час паралізаваў буйнейшыя мэдыі. У першыя хвіліны ў разгубленасьці маўчала беларускае тэлебачаньне, а навінавыя сайты не спраўляліся з шалёнай нагрузкай. Інфармацыя пра жахлівыя падзеі ў сталіцы Беларусі амаль імгненна распаўсюдзілася па сьвеце праз сацыяльныя сеткі.