Віцэ-прэм’ер патрабуе падвысіць кошт навучаньня на прэстыжных спэцыяльнасьцях у 2 разы

Узьняць да завоблачных кошты на адукацыю на найбольш прэстыжных спэцыяльнасьцях віцэ-прэм’ер ураду Беларусі Анатоль Тозік прапанаваў дзеля таго, каб прымусіць маладых людзей паступаць на інжынэрныя і пэдагагічныя спэцыяльнасьці. Альбо ўвогуле ісьці ў каледжы.

Тозік працягвае выдаваць парадаксальныя прапановы

Цяпер за кошт сродкаў бюджэту навучаецца толькі кожны трэці студэнт, а 64% усіх студэнтаў вымушаны аплачваць сваё навучаньне. «Цэны за навучаньне ў некаторых дзяржаўных ВНУ і да апошняга павышэньня літаральна «зашкальвалі», адзначае «Звязда». А сёньня на асобных спэцыяльнасьцях і ўвогуле перасягнулі 12-мільённую адзнаку.

Анатоль Тозік не жадае спыняцца на дасягнутым. Паводле інфармацыі «Звязды», нядаўна чыноўнік прапанаваў яшчэ мацней узьняць кошты на навучаньне, праўда, толькі па абраных спэцыяльнасьцях:

«Для мяне не зусім зразумела, чаму ў прыватнай ВНУ рыхтуюць спэцыяліста за 7.5 млн. рублёў у год, а ў дзяржаўнай ВНУ на аналягічнай спэцыяльнасьці кошт падрыхтоўкі спэцыяліста дасягае 17 мільёнаў рублёў», — цытуе віцэ-прэм’ера газэта.

Зьвяртаючыся да кіраўніцтва дзяржаўных ВНУ, ён сказаў:

«Давайце з вамі дамовімся на наступны навучальны год: па тых спэцыяльнасьцях, дзе назіраецца перавытворчасьць кадраў, але моладзь гэтая акалічнасьць мала турбуе, пралічвайце сабекошт падрыхтоўкі, дабаўляйце працэнты прыбытку, якія самі палічыце слушнымі, і называйце суму».

«Мы ўсе жывём ва умовах рынку. І калі малады чалавек, нягледзячы ні на што, жадае навучацца менавіта на гэтай спэцыяльнасьці, то няхай будзе гатовы выкласьці названую суму». Сярод такіх накірункаў, па якіх «назіраецца перавытворчасьць кадраў», ня раз называліся эканамічныя і юрыдычныя спэцыяльнасьці. Інжынэрныя і пэдагагічныя спэцыяльнасьці дзяржава пакуль пакідаць не зьбіраецца:

«А вось тыя спэцыяльнасьці, выпускнікі якіх у наймальнікаў літаральна нарасхват, трэба падтрымліваць», — дадаў Тозік.

На юрфак за $3 тыс.  

Цяпер паводле заяваў адукацыйных чыноўнікаў, беларускія студэнты аплочваць прыкладна 60% сваёй адукацыі. Замежнікі звычайна плацяць у два разы больш, чым грамадзяне Беларусі. Пры гэтым па афіцыйнай інфармацыі за мінулы навучальны год Мінадукацыі зрабіла студэнтам скідак з кошту платнага навучаньня на 3.89 млрд. рублёў.

Атрымліваецца, што калі задума Тозіка ажыцьцявіцца, кошт адукацыі на эканамічным і юрыдычным факультэтах БДУ складзе не цяперашнія 12 млн., а ўсе 20 ці, калі ўжо працаваць на рэнтабэльнасьць, 24 млн. рублёў альбо 3 тысячы даляраў. У год.

Пры паступленьні кошты навучаньня студэнтаў моцна не турбуюць

Паводле дадзеных апытаньня выпускнікоў школаў, праведзенага спэцыялістамі Гарадзенскага дзяржаўнага ўнівэрсытэту, наўрад ці нават апошнія «цэньнікі» прымусяць будучых першакурсьнікаў задумацца пры выбары спэцыяльнасьці.

Больш як 80% выпускнікоў сказалі, што асноўны фактар пры выбары спэцыяльнасьці для іх — гэта цікаўнасьць да канкрэтнай спэцыяльнасьці. Аднак для большай паловы старшаклясьнікаў большае значная яе прэстыжнасьць.

Першыя радкі ў гэтым рэйтынгу займаюць эканамічныя, мэдыцынскія і юрыдычныя прафэсіі. Цікава, што толькі 7% выпускнікоў зьвязваюць свой выбар з даступным коштам навучаньня. Кожны восьмы рэспандэнт плянуе навучацца на платнай аснове (а насамрэч у краіне за грошы навучаюцца 2 з 3 студэнтаў). І 42% выпускнікоў адзначылі, што ў сытуацыі выбару яны аддадуць перавагу навучаньню на прэстыжнай спэцыяльнасьці, няхай і за ўласныя сродкі.

Апытаньнем былі ахоплены 4.5 тысячы выпускнікоў школ Гарадзеншчыны.