Гітарыст J:морс Раман Арлоў пакінуў гурт і плянуе распачаць сольную кар’еру

Пра нечаканы сыход Рамана паведаміў у сваім дзёньніку лідэр J:морс Уладзімір Пугач: «Тут проста няма правых і вінаватых, вінаватых і ахвяраў. Сумная і простая праўда жыцьця ў тым, што калі ты адчуваеш у сабе патрэбнасьць рабіць іншую музыку — ты бярэш і робіш яе. Без сьлюняў і сантымэнтаў».

Раман Арлоў на канцэрце J:морс 18 сьнежня 2008 году. Аўтар фота: Юра Сідун.

Як сьцьвярджае ў сваім дзёньніку Ўладзімір Пугач, для J:морс рашэньне Арлова стала нечаканкаю:

«Рома вырашыў спыніць свой удзел у забегу, пра што й паведаміў пры сустрэчы. Прапанова „не сьпяшацца з рашэньнем і падумаць да заўтра“ выніку не дала, ды й наагул, размова атрымалася доўгай і заблытанай, як і мусіць быць у такіх сытуацыях. Сухой парэшткай размовы для мяне застаўся той факт, што Рома рэальна сасьпеў для сольнай кар’еры і адчувае мацнейшую патрэбу для яе рэалізацыі».

«Рашэньне цалкам лягічнае, калі не замарочвацца на той факт, што нам прыйшлося за 3 дні знайсьці гітарыста, каб не скасоўваць заплянаваны сэанс рэпэтыцый і запісу, і што Рома забраў з заплянаванага да новага альбому трэкліста дзьве (ці тры, гледзячы, як лічыць) напалову запісаныя песьні свайго аўтарства».

Уладзімір Пугач і Раман Арлоў на канцэрце J:морс 18 сьнежня 2008 году.
Аўтар фота: Юра Сідун.

«Тут проста няма правых і вінаватых, вінаватых і ахвяраў. Сумная і простая праўда жыцьця ў тым, што калі ты адчуваеш у сабе патрэбнасьць рабіць іншую музыку — ты бярэш і робіш яе. Без сьлюняў і сантымэнтаў. Зрэшты, перад алтаром мы не стаялі. Да таго ж, мы столькі зрабілі разам і ў нас за плячыма столькі сумесна нажытых „дзяцей“, што чужымі мы ўжо ніколі ня станем. І, замест таго, каб рэфлексаваць, лепей не забываць, што мы жывем зь мінулага ў будучае, што мы ўсё яшчэ MEN AT WORK з кучай плянаў на будучыню, проста коцімся цяпер па паралельных рэльсах», — піша Пугач.

Як адзначае TUT.by, абодва музыкі пацьвердзілі факт разьвітаньня, але ад далейшых камэнтароў адмовіліся.

На Generation.bY фотарэпартаж з апошняга канцэрту J:морс з удзелам Рамана Арлова.