Студэнты будуць у 1.5 разы болей вучыць замежную мову, а дыплёмы пісаць па-ангельску
Чыноўнікі спрабуюць прымусіць беларускую адукацыйную сыстэму загаварыць па-ангельску. І чаго толькі ня зробіш дзеля валюты: пляны па разьвіцьцю адукацыі ўлучаюць стварэньне ангельскамоўных магістратур, бакаляўрскіх праграм, MBA, заахвочваньне пісаць дыплёмы на мове яе Вялікасьці, і, натуральна, пашырэньне зубрэньня гэтай самай ангельскай студэнтамі і школьнікамі.
Паводле праграмы разьвіцьця вышэйшай адукацыі Беларусі, прынятай урадам у пачатку ліпеня, Міністэрства адукацыі спадзяецца перавесьці краіну на ангельскую мову да 2015 году. Прынамсі, менавіта да гэтага тэрміну разьлічаная праграма.
«Мяркуюцца […] павелічэньне працягласьці вывучэньня замежных моў да трох гадоў, выкладаньне асобных спэцыяльных дысцыплін і ўкараненьне практыкі напісаньня дыплёмных працаў на ангельскай мове, стварэньне студэнцкіх цэнтраў па вывучэньню замежных моў. Прадугледжваецца падрыхтоўка на англійскай мове па шэрагу спэцыяльнасьцяў магістратуры», — гаворыцца ў праграме.
Па словах намесьніка міністра адукацыі Аляксандра Жука, павелічэньне выкладаньня ангельскай мовы (ня проста замежнай, а менавіта ангельскай) зьвязанае з жаданьнем «падвысіць экспарт адукацыйных паслугаў», то бок прыцягнуць у краіну як мага болей замежных студэнтаў і іх грошай.
Болей за тое, беларускія чыноўнікі плянуюць стварыць некалькі дадатковых выключна ангельскамоўных праграм навучаньня (адзіная такая праграма пакуль існуе ў Беларускім дзяржаўным унівэрсытэце інфарматыкі і радыёэлектронікі і не карыстаецца значным попытам замежнікаў). Некаторыя праграмы стануць нават
Асобны пункт праграмы разьвіцьця адукацыі — ангельскамоўная праграма Master of Business Administration — звычайна вельмі дарагая, але і надзвычай папулярная ў бізнэсоўцаў і кіраўнікоў ступень адукацыі. Створаць яе на базе БДУ і каштаваць яна будзе 6.6 млн. даляраў за чатыры гады.
Раней было абвешчана, што з 2013 году зьявіцца абавязковы школьны іспыт па замежнай мове. Разам з тым, болей навучаць ангельскай і іншым мовам у нашых школах ня будуць. Намесьнік міністра адукацыі Казімір Фарыно проста раіць шукаць альтэрнатыўныя шляхі паглыбленьня ведаў замежнай, бо «Паглыбленага вывучэньня мовы ў нас няма».
Як паўплываюць намаганьні беларускага ўраду па прыцягненьне адукацыйнай валюты ў краіну, пакажа час. А пакуль, паводле нядаўняга перапісу, вядома, што толькі 5% беларусаў добра валодаюць ангельскай.