Многія сталічныя аматары сучаснага мастацтва не маглі прайсці міма галерэі «Ў», дзе пятнічным вечарам адбывалася адкрыццё выставы Аляксея Талстова. Дзесяць карцін на тэму грамадскай самарэгуляцыі прадставіў малады мастак, пісьменнік і музыка. Аўтарскі праект «Самакантроль» — своеасаблівая рэакцыя аўтара на сусветныя падзеі і тэндэнцыі.  

Аляксей Талстоў — малады аўтар двух раманаў і мастак, які невыпадкова падобны на рок-зорку беларускага андэграўнду, бо раней сьпяваў у беларускамоўным рэгі-гурце «Чык-чык». У сэрыі «Кім я стану, калі вырасту» Аляксей распавядае пра тое, як хлопчык-панкуша апынуўся некалі ў Маладым Фронце, чаму Кулёк — гэта жахлівае месца, а рэлігія — гэта развод, як ня стаць Іванам і не скончыць таленавітым гопнікам на раёне з комплексам беларускасьці.

Аляксей Талстоў належыць да таго пакаленьня маладых літаратараў, што адчайна імкнуцца прасунуць сваё інтэлектуальнае чытво «не для мэтрапалітэну» сярод беларускай моладзі, якой на імпрэзе сабралося ня мала. Прэзэнтацыя кнігі пачалася яшчэ ля ўваходу ў кнігарню, дзе на прыступках стаялі музыкі і гралі нешта пяшчотна-журботнае, быццам прымушаючы кожнага пакорпацца ў сабе, акурат як і кнігі Талстова.