Міністар адукацыі: рэктары ў «чорным сьпісе» ЭЗ ненадоўга

Міністар адукацыі Беларусі Сяргей Маскевіч называе санкцыі, уведзеныя супраць пяці рэктараў беларускіх ВНУ, неабгрунтаванай і часовай зьявай. У яго няма ніякіх прэтэнзій да кіраўнікоў ВНУ, што на думку праваабаронцаў адлічалі студэнтаў па палітычных матывах.

«Падставы для ўключэньня ў сьпіс відавочна адсутнічаюць. Упэўнены, што гэта часова», — пракамэнтаваў міністар уключэньне ў сьпіс неўязных у Эўрапейскі Зьвяз пяці кіраўнікоў беларускіх навучальных устаноў. Ён заявіў, што спэцыяльна вывучаў сытуацыю і ніякіх прэтэнзій з нагоды адлічэньня студэнтаў па палітычных матывах да рэктараў прад’явіць ня можа, перадае БелаПАН.

Паводле дадзеных кіраўніцы камітэту абароны рэпрэсаваных «Салідарнасьць» Іны Кулей у 2011 годзе зь беларускіх ВНУ па палітычных матывах былі адлічаныя 14 студэнтаў. Лідэрамі па адлічэньнях сталі Беларускі дзяржаўны пэдагагічны ўнівэрсытэт (4 чалавекі) і Беларускі дзяржаўны ўнівэрсытэт (3). У 2006 годзе камітэт зафіксаваў адлічэньне 189 студэнтаў, усяго з 2006 года па цяперашні час — 266 навучэнцаў.

Нагадаем, два дні таму Эўразьвяз пашырыў сьпіс асобаў, якім забаронены ўезд на яго тэрыторыю. Цяпер агульны сьпіс складае 175 чалавек. Сярод іх — 6 кіраўнікоў беларускіх навучальных установаў, у тым ліку рэктары БДУ, БДУІРу, БДПУ і БрДУ.

Рэктары, як і міністар, адмаўляюць палітычны характар адлічэньняў. Па словах Маскевіча, «былі сыгналы» аб тым, што студэнты, якія «вылучыліся» на Плошчы 19 сьнежня 2010 гады, «вучацца ня лепшым чынам». Цікава, што большая частка самых гучных адлічэньняў прыйшлася на студэнтаў апошніх курсаў завочных аддзяленьняў.

Па словах міністра, пасьля зімовай сэсіі з унівэрсытэтаў «вылецелі» каля 7 тысячаў студэнтаў, што, на яго думку, зьяўляецца звычайнай практыкай для Беларусі. Як раней казаў «неўязны» рэктар БДУ Сяргей Абламейка, зь яго ўнівэрсытэту за зімовую сэсію адлічылі 155 студэнтаў, амаль кожнага трэцяга за акадэмічную непасьпяховасьць. Нагадаем, гэта была адна з самых частых афіцыйных падстаў для адлічэньня «ненадзейных» студэнтаў.