Сёньня — першы дзень Басовішча

Сёньня, 17 ліпеня ў мястэчку Гарадок Беластоцкага ваяводзтва распачынаецца 20-ы юбілейны фэстываль Басовішча. Легендарны фэст беларускай музыкі, нягледзячы на значны ўзрост, не пазбавіўся ад старых праблем і сёлета: польскую візу ня здолелі атрымаць амаль 40% жадаючых трапіць на фэст. Сёньня на сцэну фэсту выйдуць 10 беларускіх і польскіх камандаў, а ў наступны дзень фэсту слухачы стануць сьведкамі адраджэньня адразу двух звышлегендарных гуртоў.

Амаль як для чатырох соцень жадаючых трапіць на сёлетнія Басы фэст распачаўся з грандыёзнага аблому: з 1060 заявак на бясплатныя візы польскі кансулят у Гародне здолеў задаволіць толькі 600. Прадстаўнікі руху «За Свабоду», якія займаліся візавым пытаньнем, сытуацыю не камэнтуюць.

Хаця на старую, як, здаецца, і сам фэст візавую праблему можна паглядзець зь іншага боку: больш за 600 беларусаў атрымалі магчымасьць трапіць на фэст дзякуючы бясплатным шэнгенскім візам.

Як паказвае практыка і фотаматэрыялы, на фэсьце будзе на што паглядзець і на чым адарвацца. І «юбілейнасьць» сёлетняй дзеі ў лесе пад Гарадком надае гэтаму сьцьверджаньню дадатковую вагу: на другі дзень, у суботу, арганізатары абяццаюць цуда-выставу і прагляд запісаў мінулагодніх фэстаў (нарэшце сталыя наведвальнікі даведаюцца, што ж там наздымалі тэлевізійшчыкі на працягу апошніх год).

Завершыцца апошні дзень фэсту выступам трох легендарных беларускіх рок-гуртоў: NEURO DUBEL, ULIS і NRM + MROJA (спасылка на апошні гурт кажа пра тое, што Вольскі і кампанія прыгадаюць пачатак сваёй кар'еры і выканаюць некалькі олдавых гітоў часоў Мроі).

І калі вас няма сярод тых нешматлікіх адэптаў басовішчнай культуры, што ўжо пасьпелі разьбіць свае намёты ў адмысловым лагеры за сцэнай, то інфармацыя пра даезд і жыцьцё на фэсьце можа быць для вас вельмі карыснай.

На дадзены момант праграма Басовішча-2009 выглядае так:

ПЯТНІЦА
17 ліпеня 2009, 19.00 - 2.30 

• 19.00 ZHNIUV
• 19.30 TARPACZ
• 20.00 Адкрыцьцё фэстывалю
  
• 20.10 SOK
• 20.45 BAN-ZHVIRBA
• 21.25 BN
• 22.15 RIMA
• 23.05 ZERO-85
• 00.00 ZNICH
• 00.50 IQ48
• 01.40 ŚCIANA

СУБОТА
18 ліпеня 2009, 17.00 - 2.30
Адмысловая праграма з нагоды юбілею (выстава, запісы з ранейшых фэстываляў)

• 17.00 RAHIS
• 17.35 BOSAE SONCA
• 18.15 ДЗЕЦІ ДЗЯЦЕЙ
• 19.00 OSIMIRA
• 19.45 ПАЛАЦ
• 20.30 KRAMA + BONDA
• 21.30 LAO CHE
• 23.00 NEURO DUBEL
• 23.50 ULIS
• 00.50 NRM + MROJA 

Каманда Generation.bY зычыць усім, хто зьбіраецца выправіцца на фэст добрай дарогі і чакае ўсіх на Басовішчы-2009!