Кіраўнік аддзелу па новых мэдыях кампаніі Барака Абамы марыць ізноў падпісацца на папяровыя газэты

У Менск прыехаў Джо Роспарс (Joe Rospars) — кіраўнік аддзелу па новых мэдыях у часе выбарчай кампаніі прэзыдэнта ЗША Барака Абамы. У гісторыі амэрыканскіх выбарчых кампаніяў такі кірунак працы зьявіўся ўпершыню.

Раніцай у амбасадзе ЗША спадар Роспарс рабіў лекцыю-прэзэнтацыю сваёй працы і адказваў на пытаньні беларускіх прадстаўнікоў новых мэдыяў і журналістаў.

Выбарчая кампанія Барака Абамы ўпершыню ў ЗША утрымлівала адмысловы аддзел па працы з новымі мэдыямі. Па словах Джо Роспарса, на самым пачатку аддзел New Media складаўся ўсяго толькі з двух-трох чалавек, аднак напрыканцы кампаніі толькі ў штаце Роспарса ён налічваў ужо больш за сотню супрацоўнікаў. Адным з галоўных вынікаў сваёй дзейнасьці Роспарс называе, тое, што амаль дзьве трэці агульнага бюджэту кампаніі Барака Абамы былі сабраныя дзякуючы новым мэдыям. Як гэта адбылося 27-мі гадовы Роспарс распавядаў беларусам каля дзьвюх гадзінаў.

 
Джо Роспарс. Выява daylife

Празрыстасьць. Аўтэнтычнасьць. Удзел

Прынцыпы, на якіх будавалася выбарчая кампанія Барака Абамы, на думку Джо Роспарса, дарэчныя ў абсалютна любой кампаніі — зусім не абавязкова палітычнай. Галоўнае — верыць у агульную мэту і працаваць на яе.

Празрыстасьць. Людзі могуць разумець, што вы робіце добрую справу, але важна, каб яны ведалі як вы гэта робіце. Апроч паглыбленьня стасункаў паміж вамі і вашымі прыхільнікамі, гэта дае магчымасьць ім знайсьці сваё месца для ўдзелу. Трэба быць дакладным у лічбах і ацэнках вынікаў, хоць часам такія дэталі могуць падацца нуднымі, аднак яны спрацуюць у будучыні. Важна паказваць ня толькі лідэраў кампаніі, але і людзей, якія знаходзяцца ў глыбіні працэсу.

Аўтэнтычнасьць. Важна размаўляць натуральнай чалавечай мовай, ня трэба прэс-рэлізаў і партыйнай рыторыкі. Пад час кампаніі Барака Абамы аддзел новых мэдыяў імкнуўся паказваць ня толькі свайго кандыдата, але і звычайных валянтэраў. Напрыклад, у адным з рэклямных відэа-ролікаў прыхільнікі Абамы ходзяць па дамах і заклікаюць людзей галасаваць, раздаюць налепкі. Барак Абама зьяўляецца толькі за кадрам — яго голас чуваць усяго 16 сэкундаў. Гэтае відэа сымбалізуе, што галоўнае -гэта не кандыдат ці лідэр, а яго прыхільнікі.

Удзел. Галоўны патэнцыял у тым, што звычайныя людзі могуць адчуваць сябе ўласьнікамі цэлых кавалкаў працы. І нават калі праца ня самая прыемная — гэта варта агучваць і матываваць людзей, каб было бачна, што гэта не марнаваньне часу.

Роспарс адзначыў, што была пэўная рызыка выкарыстоўваць гэтыя прынцыпы ў палітычнай кампаніі, але ў выніку рашэньне было прынятае.

Камунікацыі, арганізацыя і збор сродкаў

Аддзел па новых мэдыях у камандзе Абамы рэалізоўваў тры праекты: камунікацыі, арганізацыя і збор сродкаў.

Ва ўсёй кампаніі чырвонаю ніткаю праходзіла «двухбаковасьць стасункаў». Нават у відэароліках каманда Абамы старалася паказваць людзей, якія ўцягваюцца ў працу і самі далей робяцца яе носьбітамі.

Зазвычай у палітычных кампаніях працуюць з дзьвюма мэтавымі групамі: прэса і выбарцы. Аддзел па новых мэдыях узяўся яшчэ за адну групу — прыхільнікі. Такім чынам і матэрыялы былі больш пра прыхільнікаў, чым пра Абаму.

Для арганізацыі кампаніі аддзел Роспарса працаваў на зьніжэньне бар’еру для ўдзелу звычайных людзей у кампаніі: «Мы далі інструмант для мабілізацыі — магчымасьць праявіць людзям ініцыятыву».

Празь інтэрнэт на кампанію Барака Абамы было сабрана каля 500 мільёнаў даляраў.

«Зьбіраючы сродкі, мы стараліся не казаць пра грошы як такавыя», — адзначае Роспарс. «Абама — звычайны чалавек, які толькі што скончыў выплочваць свой студэнцкі крэдыт на адукацыю, як і большасьць амэрыканцаў. Мы паказвалі, што такі звычайны чалавек можа стаць прэзыдэнтам».

Як адзначае сам Абама гэты экспэрымэнт — наяўнасьць у штабе аддзелу па новых мэдыях? Пры адказе на гэтае пытаньне Роспарс загрузіў з youtube ролік, дзе Абама абдымаецца з маці і сястрой Роспарса і дзячыць за супольную працу. А ў адміністрацыі прэзыдэнта ўпершыню зьявілася пасада — дырэктар па працы з новымі СМІ.

Джо Роспарс зараз ужо не працуе ў камандзе Абамы, бо лічыць сваім прызначэньнем больш непасрэдную працу зь людзьмі, таму працуе цяпер у Лёндане з шэрагам эўрапейскіх некамэрцыйных арганізацыяў. А вось былы намесьнік Роспарса па працы ў аддзеле новых мэдыяў кампаніі Абамы цяпер узначальвае аддзел па новых СМІ ў адміністрацыі новага прэзыдэнта. Джо адзначае, што гэтая праца напружаная і найбольш складаная, бо зараз трэба працаваць ня толькі са сваімі прыхільнікамі, а з усёй краінай — «праца на мяжы нэрвовага зрыву».

Цяпер Роспарс марыць адпачыць ад плыняў інфармацыі і зноўку трымаць у руках па раніцах папяровыя газэты ці часопісы. Але бязь Сеціва — нікуды. Нават на менскай сустрэчы пры адказе на пытаньне «Колькі амэрыканцаў карыстаюцца Інтэрнэтам», Роспарс доўга ня думаючы палез у Google за адказам.