Літоўцы спадзяюцца зарабіць на беларускіх студэнтах

У недалёкім ад беларускай мяжы горадзе Друскініках у бліжэйшы час могуць паўстаць адразу дзве адукацыйныя інстытуцыі, арыентаваныя на беларусаў: філія Літоўскага ўніверсітэту спорту і Алітускага каледжу. Беларусаў тут параўноўваюць з абітурыентамі з афрыканскіх краінаў і прапануюць ім дзяржаўныя літоўскія стыпендыі.

Як піша delfi.lt, каледж прапануе беларусам тэхналагічныя і інжынерныя праграмы.

«Беларусы будуць нам карысныя — яны будуць плаціць за навучанне, моладзі ў Літве становіцца менш, мы ўсё думаем, дзе ўзяць моладзь, з якой можна працаваць», — кажа дырэктарка Алітускага каледжу (установы, якая мае права выдаваць і дыпломы аб вышэйшай адукацыі, аднак статус іх лічыцца ніжэйшым да дыпломы ўніверсітэтаў) спадарыня Рэмейкене. Ейны каледж навучае і бізнесу, і тэхнічным спецыяльнасцям, але ў выпадку беларусаў стаўку робіць на апошніх. Адзінае, што непакоіць літоўскіх адукатараў, — узровень ангельскай у абітурыентаў з Беларусі:

«У беларускіх студэнтаў досыць высокі ўзровень, толькі наконт ангельскай мовы я не ўпэўненая. Калі да нас прыязджаюць з Індыі, Непала, Афрыкі, яны вельмі добра ведаюць ангельскую. Але калі беларусам будзе не хапаць ведаў, мы прапануем дадатковы курс», — кажа дырэктарка каледжу Ремейкене.

Літоўскі план просты: у прымежных Друскеніках адчыняецца аддзяленне, куды беларусы будуць ездзіць па выходных, каб за чатыры гады прайсці праграму навучання і атрымаць дыплом ЕС.

Нешта падобнае ў бліжэйшы час збіраецца зрабіць і Літоўскі ўніверсітэт спорту — аналаг беларускага ўніверсітэту фізічнай культуры. Канцлер універсітэту, ён жа генеральны сакратар Літоўскай баскетбольнай федэрацыі Міндаўгас Бальчунас, кажа, што ВНУ ўжо паспела замацавацца ў памежжы:

«Адкрыццё і развіццё абумоўлена і геаграфічна, бо побач знаходзяцца Польшча і Беларусь. Беларусаў у Друскініках шмат. Прыязджалі прадстаўнікі Беларускай баскетбольнай канфедэрацыі, з імі дамовіліся, што [ўніверсітэт спорту] будзе рыхтаваць трэнераў па баскетболе для беларускага рынку. Гэта будзе міжнароднае навучанне, магістр трэнера па баскетболе Еўропы», — рэкламуе спецыяльнасць Бальчунас.

Галоўнае, што прымушае літоўскія ВНУ шукаць будучых студэнтаў у Беларусі — дэмаграфічны крызіс і недахоп студэнтаў на радзіме. Беларусы ж будуць плаціць, хаця некаторыя з іх могуць разлічваць на нядрэнныя дзяржаўныя літоўскія стыпендыі. Зрэшты, працягласць іх выплаты не перавысіць году.

Набор беларусаў у друскеніцкія філіі літоўскіх ВНУ плануецца пачаць ужо ў бліжэйшы час.