БАС выступіла з заявай па сёлетнім фэстывалі «Басовішча»

Раней нязьменны арганізатар усіх Басовішчаў «Беларускае аб’яднаньне студэнтаў» у Польшчы ўпершыню з пачатку крызысу вакол фэстывалю выступіла з заявай, у якой паабяцала ўзначаліць падрыхтоўку да фэсту і правесьці яго «на тым жа самым месцы і безь ніякіх зьменаў».

«Беларускае аб’яднаньне студэнтаў і надалей застаецца галоўным арганізатарам фэстывалю», — гаворыцца ў звароце беларускіх студэнтаў Польшчы, разьмешчаным на старонцы музычнага фэсту ў Фэйсбук.


Так Басовішча выглядала тры гады таму

Аднак гэтым разам у сувязі зь «няпэўнасьцю, зьвязанай з далейшым функцыянаваньнем» БАС, і «складанай сытуацыяй вакол нашых грашовых разьлікаў з органамі дзяржаўнай улады», да арганізацыі далучацца новыя людзі.

Сярод ініцыятываў, што аказалі «неацэнную дапамогу ў рэарганізацыі», называюцца дзьве беластоцкія няўрадавыя арганізацыі: Pogotowie Kulturalno Społeczne («Культурна-грамадзкая хуткая дапамога») і Stowarzyszenie Kreatywne Podlasie (Творчае таварыства Падляшша).

«У гэтым годзе будзем супольна зарганізоўваць Фэстываль музыкі маладой Беларусі „Басовішча“ на тым жа самым месцы і без ніякіх зьменаў клімату», — гаворыцца ў заяве БАС.

Без рэпутацыі і грошай

Такі камэнтар БАС — першы з часу зьяўленьня ў СМІ інфармацыі аб верагодным правале арганізацыі фэсту 2012 году. «Басовішча» аказалася пад сур’ёзнай пагрозай з-за рашэньня польскіх уладаў адмовіць у падтрымцы яго заснавальнікам і традыцыйным арганізатарам з-за хібаў з фінансавай справаздачнасьцю.

Быў нават абвешчаны конкурс на пошук новага арганізатара. Адзінай ініцыятывай, што падала заяўку на ўдзел у ім, стала невялікая культурніцкая арганізацыя «Культурна-грамадзкая хуткая дапамога», што з 2007 году ладзіць канцэрты і іншыя культурныя імпрэзы ў Польшчы. Інфармацыя аб гэтым трапіла ў прэсу на мінулым тыдні.

Аднак БАС заяўляе, што менавіта яно возьме на сябе галоўную ролю ў арганізацыі фэсту. Акрамя гэтага новаабранае кіраўніцтва аб’яданьня прызнала хібы ў фінансавай справаздачнасьці папярэдніх арганізатараў і патлумачыла адсутнасьць афіцыйнай пазыцыі арганізацыі выбарамі гэтага самага новага кіраўніцтва.

Сродкі на фэст сёлета БАС будзе спрабаваць здабываць зь іншых крыніцаў:

«Мы ўзялі ўдзел у некалькіх конкурсах на атрыманьне грантаў, з дапамогай якіх мы спадзяемся сабраць сродкі на арганізацыю «Басовішча», — гаворыцца ў заяве арганізацыі. Раней паведамлялася, што сродкі на фэстываль ранейшыя фундатары ўсё ж такі вылучаць, але не БАС, а трэцяй арганізацыі, якой, верагодна, стане «Культурна-грамадзкая хуткая дапамога». Апошняя ў сваю чаргу ўжо заявіла аб супрацы з Аб’яднаньнем студэнтаў.

Беларускае аб’яднаньне студэнтаў заклікала далучацца да яго ў справе арганізацыі фэсту.

Каментары праз FACEBOOK



 
In 0.0072 seconds.