На інтэрнэт-аўкцыён выставілі жыцьцё зубра з Пушчы

«Унікальны экзэмпляр» зубра зь Белавескай пушчы выстаўлены на інтэрнэт-аўкцыён. Пачатковы кошт — 40 тысячаў эўра. Пераможца атрымае магчымасьць забіць зубра і вывезьці яго за мяжу.

Белавескі зубр дагэтуль занесены ў Чырвоную кнігу

На сайце «Паляваньне і рыбалка ў Беларусі» ДУ «ЦентрКурорт», якое належыць адміністрацыі прэзыдэнта, на аўкцыён выстаўлены зубар. Лёт пад нумарам 15 рэклямуецца як «ўнікальны экзэмпляр» зубра, «самец, які не прызначаны для свабоднай паляваньня, з рэзэрвовага генафонду».

Першапачатковы кошт зубра — 40 тысячаў эўра. Пераможца аўкцыёну атрымае магчымасьць забіць жывёлу з уласнай зброі на тэрыторыі Белавескай Пушчы, а таксама вывезьці «трафэй» за мяжу. У якасьці бонусу прапануецца права на прэпараваньне зубра.

Інтэрнэт-аўкцыён будзе доўжыцца да 2 сакавіка. Імгненна атрымаць жыцьцё зубра можна за 50 тысячаў эўра. Арганізатары аўкцыёну адзначаюць, што праводзяць яго ў адпаведнасьці з указам прэзыдэнта.