Ліст Мінгарвыканкаму: піць піва на вуліцах дазволена. Раздрукуй і абараняй свае правы прафэсійна!

Дзякуючы актыўнай менскай блогерке Мінгарвыканкам афіцыйна абверг інфармацыю пра тое, што на вуліцах Менску забаронена піць піва. Цяпер кожны ў выпадку прэтэнзій з боку праваахоўных ворганаў можа спасылацца на афіцыйны адказ мэрыі гораду, копію якога адмыслоўцы раяць мець з сабой на ўсялякі выпадак у якасьці дадатковага аргумэнту.

Як мы пісалі раней, паводле прынятых парлямэнтам у пачатку лета паправак у заканадаўства, за расьпіцьцё піва і слабаалькагольных напояў у грамадзкіх месцах уводзіцца адміністрацыйная адказнасьць. Правапарушальнік будзе вымушаны заплаціць да 280 тыс. (ці 8 базавых велічыняў).

Але гэтыя папраўкі ня толькі не набылі моц, але і не былі разгледжаныя ніжняй палатай парлямэнту ў другім чытаньні. Але гэты факт не перашкодзіў прадстаўнікам праваахоўных ворганаў сталіцы «зганяць» любіцелей піва з цэнтральных сквэраў і вуліц Менску.

Як піша ў сваім блогу карыстальніца up_paradox «З канца вясны мне жыцьця не даюць „стражи парадку“, якія ўвесь час замінаюць піць піва ў добрай кампаніі на пляцах у нашым славутым горадзе-героі, абгрунтоўваючы гэта мітычным „указам Мінгарвыканкама“ пра забарону гэтага дзеяньня ў цэнтры Менска».

У выніку блогерка напісала афіцыйны запыт ў Мінгарвыканкам, які і падцьвердзіў у сваім лісьце, што піць піва на вуліцах Менску ніхто не забараняў.

Спампаваць прыдатную для друку копію ліста можна тут.