На «Ночы Ваўкалака» перамог гурт «Da!Бл…»

У нядзелю ўвечары сталі вядомыя пераможцы полацкага рок-фэсту «Ноч Ваўкалака». Прыемнай нечаканасьцю стаў выступ гурта «Da!Бл…» зь вёскі Нарач — за што і атрымаў гран-пры і прыз глядацкіх сымпатыяў. Усяго было сем канкурсантаў, у якасьці сталічных гасьцей прыехаў Neuro Dubel. Адна з арганізатарак фэсту, паэтка Лера Сом запэўніла, што і надалей арганізатары будуць імкнуцца праводзіць фэст.

Гурт «Da!Бл…» выступае на Ночы Ваўкалака 2008. Фота ximik.info.

У конкурснай частцы выступілі: «Argentum» (Віцебск), «Da!Бл…» (в. Нарач), «Denial of Life» (Наваполацак), «Алмазны Фронт» (Віцебск), «Акропаль» (Смалявічы), «Восьмыдзень» (Віцебск), «РоСтра» (Менск). 

Лера Сом прызналася Generation.by, што і для яе самой вынікі конкурсу сталі нечаканымі — перамог гурт «Da!Бл…» зь вёскі Нарач Мядзельскага раёну. Водгукі пра выступ самыя найлепшыя, а хутка яго змогуць пачуць і тыя, хто на фэст не патрапіў: галоўным прызам стаў запіс песьні на студыі ў Менску:

«Гурт даслаў самы дрэнны па якасьці запіс. А падчас фэсту выступілі лепей за ўсіх».

Нагадаем, што арганізатары абралі ў якасьці галоўнага прыза менавіта запіс — каб гурт меў нейкі фізычны вынік сваёй перамогі:

«На маю думку, гурт мусіць разьвівацца далей. А прызавыя месцы на многіх конкурсах нічога не даюць апроч прыемнага адчуваньня», — лічыць Лера. І дадае: «Радуе, што ўражаньні ад „Ночы Ваўкалака“ ў людзей засталіся самыя добрыя. Конкурсная частка нават зацягнулася, таму хэдлайнэры — гурт Neuro Dubel — выступалі трохі меней».

Апроч Neuro Dubel, на сцэну ў якасьці гасьцей выйшлі віцебскі гурт «Kripa» і полацкі гурт «Indra». Удзельнікі апошняга да таго ж, разам з Лерай Сом, зьяўляюцца і арганізатарамі фэсту. 

«Ноч Ваўкалака» прайшла ў другі раз, але летась не было конкурснай часткі. Нягледзячы на тое, што ўсё атрымалася, Лера Сом не сьпяшаецца загадваць на наступны год, але запэўнівае, што працягваць «Ночы Ваўкалака» вельмі хочацца.