Міністар адукацыі: Студэнтаў ня будуць адлічваць за ўдзел у Плошчы

Міністар адукацыі Беларусі Сяргей Маскевіч заявіў, што за ўдзел у акцыях пратэсту 19 сьнежня студэнтаў адлічаць ня будуць. Тым часам ужо некалькі навучэнцаў менскіх і рэгіянальных ВНУ сьцьвярджаюць, што былі адлічаныя ў сувязі зь іх удзелам у Плошчы. Па словах міністра, некаторыя студэнты самі хочуць быць адлічанымі.

«Ніякіх адлічэньняў з вышэйшых навучальных установаў за ўдзел у акцыі 19 сьнежня ня будзе, можаце не сумнявацца», — перадае словы Маскевіча агенцтва «Інтэрфакс-Захад».

Па словах міністра адукацыі, «некаторыя людзі правакавалі сябе, каб іх адлічылі з ВНУ. Ацэнку іх дзеяньням дадуць праваахоўныя органы ў рамках дзейнага заканадаўства», — сказаў міністар.

Таксама міністар адукацыі даў цікавую інтэрпрэтацыю Кодэксу аб адукацыі, які яшчэ ня дзейнічае, але па ім, як вынікае са словаў Маскевіча, ужо працуе Мінадукацыі:

«У адпаведнасьці з Кодэксам аб адукацыі, адлічыць можна толькі за прагулы», — лічыць Сяргей Маскевіч.

Тым часам стала вядома пра некалькі выпадкаў адлічэньня студэнтаў. Сапраўды, ніводны не зьвязаны ні з прагулам, ні з дысцыплінарнымі спагнаньнямі. Адлічаюць, звычайна, проста за «выпадкова» няздадзеныя іспыты і залікі. Міністар адукацыі зьвязвае гэтыя адлічэньні «з акадэмічнай непасьпяховасьцю», а не з «палітычнымі поглядамі» студэнтаў.