Беларускі парлямэнт прыняў у першым чытаньні папраўкі, якія забараняюць падлеткам да 16 гадоў пасьля 23 гадзін знаходзіцца ў грамадзкіх месцах без бацькоў. Міліцыю абавяжуць дастаўляць дзяцей іх бацькам, калі ж такія ня знойдуцца, падлеткаў будуць развозіць па сацыяльна-пэдагагічных цэнтрах.

Народжаныя ў 2000-х — пакаленьне Z — ужо ўпэўнена перабіраюцца з садкоў у школы. Гэтыя хлопчыкі і дзяўчынкі слаба ўяўляюць сьвет без мабільных тэлефонаў і Сеціва, а касэтныя магнітафоны калі й бачылі, то толькі ў бабуляў. У наступным дзесяцігодзьдзі яны пойдуць ва ўнівэрсытэты, а пакуль 85 тысяч першаклясьнікаў пабывалі на сваім першым ўроку ў жыцьці. Мы таксама завіталі на першы званок і зафіксавалі эмоцыі паўсотні новых навучэнцаў беларускамоўнай гімназіі № 23 Менску.