«АртПоле» — не проста фестываль, гэта атмасферная з'ява, пастаяннае ўзаемадзеянне адзін з адным і з усім, што вакол. Усе, хто апынецца ў гэтым месцы ў гэты час, становяцца ўдзельнікамі аднаго працэсу, які часам называюць жыццём, а часам — мастацтвам. На «АртПоле» публіка не аддзяляецца ад артыстаў, бо кожны можа адкрыць схаваныя здольнасці. Адзін мастацкі кірунак не аддзяляецца ад іншага, а толькі дапаўняе, ствараючы чароўную шматгранную рэчаіснасць. Чалавечае асяроддзе не аддзяляецца ад прыроднага. Галоўнае — максімальна далёка адысці ад штучна створаных дэкарацый і эфектаў, даць сэрцу працаваць на поўную, каб на гэтай неверагоднай хуткасці, якую дае толькі агульная энергія, адправіцца далей.

«Вандроўка на любы фестываль — гэта заўсёды чаканне пазітыўных эмоцый, новых знаёмстваў ды файнай музыкі, — піша пра ўкраінскі фэст „АртПоле“ знаўца ўсходнееўрапейскіх фестываляў Спадар Спірт. — Калі ты ніколі не чуў большасць гуртоў, што маюць выступіць на галоўнай сцэне фэсту, гэта не страшна, бо на такім мерапрыемстве як юбілейнае 10-е „АртПоле“ нецікавых каманд не бывае».