Нямецкі экспрэсіянізм у Менску

«Голем, як ён прыйшоў у свет» — нямы мастацкі фільм эпохі кінаэкспресіянізму. Быў створаны Карлам Бёзэ і Паўлем Вегенерам па матывах яўрэйскага падання пра Голема — ажыўленай магіяй глінянай статуі. Фільм, які пераказвае паданне пра стварэнне і першы бунт Голема, лічыцца класічнай экранізацыяй гэтага сюжэта. Шмат у чым дзякуючы выразнаму выкананню ролі Голема Паўлем Вегенерам, вобраз глінянага чалавека, што быў ажыўлены магіяй, набыў шырокую вядомасць, хоць і быў пасля адціснуты ў бок падобным па сэнсе вобразам пачвары, якая была створана Франкенштэйнам. 

У «Нервах» сцэнарыст, режысёр і прадзюсар Роберт Райнерт  імкнуўся аднавіць атмасферу «нервовай эпідэміі», выкліканай вайной і галотай, «якія зводзяць людзей з глузду». Гэтая ўнікальная карціна жыцця Германіі ў 1919 годзе, знятая ў Мюнхене, апісвае лёсы людзей з розных пластоў грамадства: прамыслоўца Ролафа, які страціў веру ў тэхнічны прагрэс, настаўніка Ёханэса, які выступае на сходах за сацыяльныя рэформы, і сястры Ролафа Мар'і, якая абрала шлях рэвалюцыйнай барацьбы.

Банкаўскі касір, які ненавідзіць штодзённае жыццё, крадзе грошы, каб пакінуць цесны свет, у якім жыве, але выхад за яго межы прыносіць адны толькі расчараванні... «Ад світанку да паўночы» — забыты шэдэўр эпохі нямецкага экспрэсіянізму, які доўгія гады лічыўся згубленым і быў цудам знойдзены ў Японіі ў пачатку 60-х гадоў. Кіназнаўцы адносяць яго да так званага «калігарызму» — кірунку, які зрабіўся модным пасля поспеху «Кабінета доктара Калігары».

Кампанія арыстакратаў збіраецца ў загарадным маёнтку на восеньскае паляванне, аднак нечаканае з'яўленне графа Ойча, якога ўсе лічаць забойцай уласнага брата, разбурае пачатковую задуму. Адна з ранніх работ легендарнага рэжысёра Фрыдрыха Вільгельма Мурнаў «Замак Фагелёд» дае яскравае ўяўленне аб развіцці самабытнай творчай манеры рэжысёра, якая ў поўнай меры праявіць сябе ў такіх фільмах, як «Насферату, сімфонія жаху» і «Прывід».