Вайскоўцы пужаюць студэнтаў паказальнымі працэсамі над ухілістамі

Болей за паўтысячы студэнтаў БДУ стануць сьведкамі паказальнага судовага працэсу над прызыўнікамі, што спрабавалі ўхіліцца ад службы ў беларускім войску.

Асноўная мэта мерапрыемства, якое адбудзецца сёньня ў ліцэі БДУ, — «падвышэньне ўзроўню вайскова-патрыятычнага выхаваньня» і «памяншэньне колькасьці выпадкаў ухіленьня грамадзян ад прызыву». Дзеля дэманстрацыі ўсёй моцы і справядлівасьці беларускай судовай сыстэмы на выязны працэс абавязалі зьявіцца болей за паўтысячы студэнтаў Белдзяржунівэрсытэту. Пра гэта піша агенцыя «Мінск-Навіны».

За апошнюю прызыўную кампанію ваенкаматы знайшлі 276 менчукоў, якія не пажадалі ісьці ў войска, паведамляе БелТА. Супраць іх завялі крымінальныя справы, адну зь якіх і будуць разглядаць сёньня публічна.

А ўчора патэнцыйных прызыўнікоў спрабавалі зацікавіць службай войску ў час «Дня прызыўніка» ў адной з частак унутраных войскаў Менску. Сярод іншага школьнікам паказалі выступ спэцназу, вэтэранаў і канцэрт.

Часьцей за ўсё з прызыўнікоў, якія спрабуюць адхіліцца ад службы, спаганяюць штрафы, якія даходзяць да 5 мільёнаў рублёў.

У час апошняй кампаніі па прызыву грамадзян на тэрміновую вайсковую службу прызыўныя камісіі прайшлі больш за 66 тысяч хлопцаў. Асноўная частка зь іх атрымала адтэрміноўкі ад прызыву.