Міністар абароны Нямеччыны сышоў у адстаўку з-за сьпісваньня

Два тыдні таму ў нямецкай прэсе зьявіліся публікацыі, якія абвінавачвалі міністра абароны Нямеччыны ў плягіяце яго кандыдацкай дысэртацыі. Міністар ад дысэртацыі і навуковай ступені адмовіўся, але тое не дапамагло: сёньня Цу Гутэнбэрг быў вымушаны падаць у адстаўку.

Цу Гутэнбэрг у час вельмі непрыемных для яго слуханьняў па пытаньню сьпісанай дысэртацыі ў парлямэнце Нямеччыны. Фота Beta/AP

Падчас руціннай праверкі прафэсар юрыспрудэнцыі Брэмэнскага ўнівэрсытэту знайшоў плягіят, прасьцей кажучы, сьпісваньні ў дысэртацыі на ступень кандыдата юрыдычных навук міністра абароны Нямеччыны Карла Тэадора цу Гутэнбэрга.

Распачаўся скандал. Прафэсар юрыспрудэнцыі Фішэр-Лескана назваў працу цу Гутэнбэрга «дзёрзкім плягіятам». На яго думку, пачатак дысэртацыі міністар узяў зь Вікіпэдыі, а ў многіх месцах тэкст проста сьпісаны зь іншых артыкулаў і дакладаў. Паступова спэцыялісты выявілі болей за 100 старонак плягіяту ў міністэрскай дысэртацыі.

Ад пачатку міністар паспрабаваў абараняць сябе, заявіўшы, што пісаў дысэртацыю добрасумленна. Але колькасьць доказаў у плягіяце нарастала як сьнежны ком, у парлямэнце нават прайшлі адмысловыя слуханьні, прысьвечаныя дысэртацыі міністра. У выніку цу Гутэнбэрг ня вытрымаў ціску і вырашыў сысьці з пасады.

«Гэта адзін з самых балючых момантаў майго жыцьця, — пракамэнтаваў сваё рашэньне цу Гутэнбэрг. — Я заўсёды гатовы змагацца, але дасягнуў мяжы сваіх сіл».

Lenta.ru апісвае, як міністар патлумачыў журналістам, чаму ён марудзіў з адстаўкай, якую апазыцыя дамагаецца вось ужо на працягу двух тыдняў. «Для прыняцьця рашэньня такога маштабу патрабуецца пэўны час», — сказаў цу Гутэнбэрг. Акрамя таго, па словах міністра, ня так проста разьвітвацца са справай, якой «адданы целам і душой».

Цу Гутэнбэрг стаў ініцыятарам адмены прызыву ў нямецкае войска, а таксама вялікай рэформы ўзброеных сіл. Яго лічылі самым папулярным нямецкім палітыкам.