Беларускія сілавікі выходзяць у Twitter?

Усьлед за таварышамі з кітайскай паліцыі, што на мінулым тыдні ініцыявала масавае стварэньне мікраблогаў сваіх супрацоўнікаў для паляпшэньня іміджу, у беларускім Сеціве зьявіліся аналягічныя мікраблогі КДБ і Міністэрства абароны. Застаючыся пакуль на менш афіцыйным узроўні, чым іх сталыя калегі-юзэры з ГУУС Менску, якія вядуць Twitter даволі даўна, сілавікі пакуль вольна дыскутуюць у Сеціве з «простымі грамадзянамі».

Шэфы кітайскай паліцыі вырашылі ўзьняць уласны імідж у вачах шарагоўцаў праз масавы выхад супрацоўнікаў правааходных органаў у кітайскі аналяг сацыяльнай сеткі Twitter. Апошняя, дарэчы, ужо год як перакрыта на прасторах Паднябеснай з-за палітычнай небясьпекі для ўладаў. Як і ў арыгінальнай сусьветнай вэрсіі, у кітайскім сэрвісе мікраблогаў можна пакідаць допісы памерам ня болей за 140 сымбаляў.

Рупар кітайскіх уладаў агенцыя «Сіньхуа» патлумачыла раптоўнае зьяўленьне твітэр-акаўнтаў больш чым 500 супрацоўнікаў паліцыі імкненьнем «скіраваць грамадзкае меркаваньне» ў патрэбным накірунку. Акрамя таго паліцыя ў кітайскім Інтэрнэце зоймецца, у прыватнасьці, інфармаваньнем аб больш бясьпечных паводзінах у грамадзтве і ў хаце.

Выйсьці ў Твітэр паліцэйскія вырашылі пасьля закліку аднаго з шэфаў кітайскай паліцыі, які параіў ім лепей выкарыстоўваць магчымасьці сацыяльных сетак для працы з насельніцтвам. Працаваць прыйдзецца даволі шмат: як паведамляе BBC, у кітайцаў ня надта станоўчае стаўленьне да супрацоўнікаў праваахоўных органаў, бо тыя лічыцца карумпаванымі аматарамі жорстка абыходзіцца з уласнымі грамадзянамі.

У Твітэры зьявіліся акаўнты КДБ і Міністэрства абароны

Усьлед за кітайскімі калегамі мікраблогі завялі супрацоўнікі беларускага Камітэту дзяржаўнай бясьпекі і Міністэрства абароны. Пра асобаў, якія стаяць за гэтымі акаўнтамі, вядома пакуль няшмат.

Так, акаўнт Міністэрства абароны завецца сьціпла «Минобороны РБ» і крочыць за (то бок сябруе з) USArmy — афіцыйны Твітэр войскаў ЗША, а таксама Пэнтагонам, БРСМ, тым жа КДБ і ГУУС Менску.

І калі міліцэйскі акаўнт, бадай першы ў Беларусі афіцыйны мікраблог, вядзецца ўжо даволі даўна, то юзэр KGB_Minsk існуе непрацяглы час — паўстаў ён празь некалькі тыдняў пасьля падзеяў Плошчы.

Уладальнік KGB_Minsk сьцьвярджае, што ў КДБ працуе «шмат сапраўдных патрыётаў Беларусі», адказвае на пытаньні іншых юзэраў клясычным правапісам і прызнаецца, што працуе ў КДБ па разьмеркаваньні.

Ужо на наступны дзень пасьля зьяўленьня акаўнту КДБ-Мінск журналісты высьветлілі, што ён не належыць афіцыйным прадстаўнікам КДБ, хаця аўтар допісаў у мікраблогу сьцьвярджае, што зьяўляецца супрацоўнікам Камітэту дзяржаўнай бясьпекі. Праверыць гэта дакладна пакуль не атрымалася, хаця мікраблогер, па яго словах, ужо паслаў свае дакумэнты дзеля пацьвярджэньня статусу адміністрацыяй Твітэру.