Hi-Tech супраць аматараў сьпісаць на іспытах

У Вялікабрытаніі сёлета будзе задзейнічаны цэлы арсэнал рознага кшталту прыладаў у духу Джэймса Бонда для змаганьня з аматарамі сьпісаць на іспытах.

Яшчэ ў мінулым годзе іспытная камісія Edexcel выкарыстоўвала высокатэхналягічны падыход, уключаючы электронную маркіроўку старонак з заданьнем для таго, каб стрымаць вучняў ад сьпісваньня.

Да пачатку іспытаў у гэтым годзе камісія сьпяшаецца ўвесьці новыя прылады, годныя Джэймса Бонда.

Назовы школ будуць пазначаныя на іспытных лістах з выкарыстаньнем «мікратэкста», які дазваляе ствараць вадзяныя знакі для доказу сапраўднасьці папераў, бо зрабіць фотакопію «мікратэкста» немагчыма.

Гэта таксама дазволіць у выпадку парушэньня бясьпекі прасачыць, з якой школы дайшлі іспытныя лісты.

Пакеты, у якіх іспытныя лісты будуць накіраваныя ў школы, абсталююць радыёперадатчыкамі. І экзамэнатары змогуць сачыць за іспытнымі лістамі дыстанцыйна, каб атрымаць гарантыю, што іх ніхто не чапаў.

Камісія будзе выкарыстоўваць адмысловае кампутаровае забесьпячэньне для змаганьня з плягіятам, каб аналізаваць пісьмовыя адказы вучняў і правяраць, не ці сьпісвалі яны, то бок ці няма падазронага падабенства ў адказах. 

У Беларусі тым часам Hi-Tech хутчэй выступае пакуль болей на баку спрытных студэнтаў. Вельмі папулярным перад іспытамі робіцца арэнда мікранавушнікаў для мабільных тэлефонаў. Так, напрыклад, на форуме Generation.by такіх прапановаў вельмі шмат.