Расейская кампанія SUP набыла ўвесь Livejournal
Праз год пасьля заключэньня першага пагадненьня паміж амэрыканскай Six Apart і расейскай (афіцыйна міжнароднай) кампаніяй SUP пра абслугоўваньне кірылічнай часткі LJ падпісанае апошняе пагадненьне паміж імі. Livejournal цяпер цалкам прададзены SUP.
360 тыс. $ за беларусаў
Афіцыйная інфармацыя ад Sup і Six Apart не уключае суму ўгоды. Аднак паводле дадзеных расейскага выданьня Коммерсант, яна складае ўсяго $30 млн. Гэта параўнальна няшмат, бо Livejournal імкліва губляе сваю аўдыторыю ў ЗША – многія карыстальнікі сыходзяць у сацыяльныя сеткі такія як Facebook.
Агульная колькасьць створаных у LJ акаўнтаў карыстальнікаў зараз налічвае 14 363 124, аднак актыўныя зь іх толькі 1 725 794. Выходзіць, што SUP заплаціў прыблізна па 17$ за жывы акаўнт.
З усіх акаўнтаў Livejournal у 21 142 краінай жыхарства пазначаная Belarus. Не вядома колькі з гэтых акаўнтаў зьяўляюцца жывымі, аднак з гэтых лічбаў выходзіць, што ўсе беларусы ў Livejournal каштуюць прыблізна 360 тыс. $.
LiveJournal Advisory Board
Намінальна сэрвісам Livejournal будзе кіраваць амэрыканская кампанія LiveJournal, Inc., якая адпаведна мусіць выконваць амэрыканскае заканадаўства. «SUP» адмыслова стварыў гэту кампанію, галоўная структура яе будзе знаходзіцца ў Сан‑Францыска.
У кампаніі будзе створаная спэцыяльная Рада LiveJournal Advisory Board, куды, сярод іншых, увойдуць заснавальнік LiveJournal Брэд Фіцпатрык і два прадстаўнікі зь ліку удзельнікаў супольнасьці Livejournal. Гэтых прадстаўнікоў абяцаюць абіраць на адкрытых выбарах на абмежаваны тэрмін.
100 дзён
Новай кампаніяй LiveJournal Inc вызначаныя мэты разьвіцьця сэрвісу, якія яна плянуе дасягнуць у першыя 100 дзён пасьля ўгоды. Гэтыя пляны канцэнтруюцца на трох асноўных складніках: практычнасьць - паляпшэньне навігацыі і юзабіліці; сацыялізацыя – паслугі паведамленьняў і пошук сяброў; агульныя тэхнічныя паляпшэньні – павелічэньне хуткасьці працы сайта. Акрамя гэтых задач, новая каманда будзе выпраўляць існыя праблемы.
Хто куды
Яшчэ год таму пасьля першай угоды паміж SUP і Six Apart многія асьцярожныя карыстальнікі ЖЖ зь Беларусі, Расеі ды Ўкраіны пачалі шукаць іншыя пляцоўкі для сябе замест Livejournal. Бо выказалі недавер да прынцыпаў працы расейскай кампаніі, пад апеку якой трапілі. Аднак у гэты час захоўвалася тэхнічная магчымасьць адмовіцца ад паслугаў SUP.
Адразу праз некалькі гадзінаў пасьля зьяўленьня ў Сеціве інфармацыі аб продажы Livejournal у беларускіх дзёньніках пачалі зьяўляцца паведамленьні з прапановамі ўсім разам сысьці на іншую пляцоўку. Вельмі верагодна, што цяпер размовы не застануцца толькі размовамі.