У Беларусі заведзена ўжо амаль 100 крымінальных справаў за адмову ехаць па разьмеркаваньні
Распачатыя крымінальныя справы па фактах непрыбыцьця да месца разьмеркаваньня супраць
Беларускі бюджэт працягваецца папаўняцца за кошт сродкаў студэнтаў, якія не пажадалі працаваць прызначаныя 2 гады па разьмеркаваньні. Начальнік упраўленьня вышэйшай і сярэдняй спэцыяльнай адукацыі Мінадукацыі Юрый Міксюк на прэс-канфэрэнцыі 25 кастрычніка ў Менску паведаміў, што ў Беларусі распачатыя крымінальныя справы па фактах непрыбыцьця да месца разьмеркаваньня супраць 65-ці выпускнікоў ВНУ і 34-х выпускнікоў сярэдніх спэцыяльных навучальных устаноў. Затраты на навучаньне ўжо кампэнсавалі 16 выпускнікоў ВНУ і 7 выпускнікоў ССНУ.
Яшчэ ў верасьні Міністэрства адукацыі паведамляла толькі пра 12 выпускнікоў, што адмовіліся ехаць па разьмеркаваньні.
Сп. Міксюк распавёў таксама, што тэрмін працы па прымусовым разьмеркаваньні не павялічыцца, то бок застанецца 2 гады замест узгаданых 5-ці. А праект новага палажэньня аб разьмеркаваньні, над якім працуе міністэрства, мусіць толькі ўдакладніць і ўрэгуляваць палажэньні па працэсу разьмеркаваньня, вяртаньня студэнтамі сродкаў і ахапіць палажэньні Працоўнага кодэкса Беларусі, а таксама адпавядаць закону «Аб вышэйшай адукацыі», які ўступіць у сілу 20 студзеня 2008 года.
Сёлета каля 22 тыс. з 70 тыс. выпускнікоў ВНУ падпалі пад разьмеркаваньне. Прыблізна 6% зь іх атрымалі права на свабоднае працаўладкаваньне — гэта інваліды, дзеці інвалідаў, а таксама выпускнікі, якія маюць дзяцей ва ўзросьце да трох гадоў, і некаторыя іншыя катэгорыі. У адпаведнасьці з Палажэньнем да іншай катэгорыі адносяцца таксама цяжарныя на момант разьмеркаваньня студэнткі і жонкі/мужы супрацоўнікаў МУС, КДБ і г.д.
Чыноўнік з Мінадукацыі таксама паведаміў, што сёлета па ўласным жаданьні былі разьмеркаваныя 12,5% маладых спэцыялістаў, якія вучыліся на платнай аснове.