Міністар замежных спраў Вялікабрытаніі завёў блог

Надыйшлі часы новых палітычных камунікацыяў: жанчыны-палітыкі распранаюцца, а мужчыны становяцца больш камунікабельнымі. Дэвід Мілібэнд - першы брытанскі блогер-міністар. З учорашняга дня ён пачаў весьці чарговы блог ужо ў якасьці міністра замежных спраў. А глябальныя праблемы малады палітык вырашае разам з Анжалінай Джалі.

Міністар замежных спраў Вялікабрытаніі завёў уласны блог на сайце Міністэрства. Першы запіс быў зроблены ўчора: у амаль дзьвюхвілінным роліку, зьнятым у аэрапорце Хітроў, міністар дзеліцца сваімі плянамі. На старонках блогу Дэвід Мілібэнд прапануе знаёміцца з ягонымі думкамі наконт прыярытэтаў, ідэяў і каштоўнасьцяў зьнешняй палітыкі Вялікабрытаніі, а таксама выказваць сваё стаўленьне. У Дэвіда ёсьць і ўласны сайт.

Па шчырым меркаваньні палітыка, хаця міжурадавыя кантакты дзяржаваў не губляюць сваё істотнае значэньня, бізнэс і грамадзкія аб’яднаньні робяць усё больш важкі ўнёсак у разьвіцьцё і зьмену сусьветнага ладу.

Таму Дэвід Мілібэнд падтрымлівае новы стыль палітычных камунікацыяў. Ён абяцае аднаўляць блог некалькі разоў на тыдзень, аздабляючы яго відэа файламі.

Сам Дэвід зьяўляецца прыкладам маладога, актыўнага і адукаванага палітыка. Яму ўсяго 42 гады і ён поўны энэргіі і ідэяў. Фатэль міністра замежных спраў Дэвід атрымаў 28 чэрвеня бягучага году.

Дэвід вёў блогі і на папярэдніх міністэрскіх пасадах. Ягоная ініцыятыва карысталася і карыстаецца вялікай папулярнасьцю. І хаця сёньня ўсё болей і болей палітыкаў выкарыстоўваюць блогі, менавіта Дэвід Мілібэнд быў першым брытанскім міністрам, які пачаў рабіць уласныя запісы.

Дэвід не адзіны міністар замежных спраў, які вядзе блог. Консул Швэцыі ў Беларусі Стэфан Эрыксан распавёў Generation.by, што міністар замежных спраў ягонай краіны Карл Більдт таксама вядзе блог.

А яшчэ Дэвід Мілібэнд падчас сваёй вандроўкі ў Нью-Ёрк зьбіраецца сустрэцца з Анжалінай Джалі, каб абмеркаваць зь ёй глябальныя праблемы. Як вядома, адна з самых прыгожых жанчынаў плянэты зьяўляецца амбасадарам добрай волі ААН. 

Хто ведае, магчыма менавіта за такімі палітыкамі і гэткім стылям камунікацыяў будучыня і часы зачыненых міністэрскіх дзьвярэй прамінулі.

Фота з Welt.de