Міхаіл Гарбачоў зьняўся ў рэкляме сумак

Першы і апошні прэзыдэнт СССР стаў тварам новай рэклямнай кампаніі аднаго зь вядомейшых сусьветных брэндаў сумак  - Louis Vuitton. Убачыць першага прэзыдэнта СССР з падарожнай валізай Louis Vuitton можна будзе ў верасьнёвым Vogue.

Пра такі крок палітыка паведаміла The New York Times

А ў жнівеньскім нумары з сумкай LV красуецца Скарлет Ёхансан. Для кампаніі The Art of Travel (Мастацтва вандраваць) знакамітая фатограф Annie Leibovitz зрабіла здымкі шэрагу зорак: тэнісістаў Андрэ Агасі і Штэфі Граф, акторкі Катрын Дэнёў. З усіх іх Гарбачоў у найбольш напружанай і няўтульнай атмасфэры.

Гэта ня першае зьяўленьне Міхаіла Гарбачова ў рэкляме – былога прэзыдэнта краіны, у якой многія з нас некалі нарадзіліся, можна было ўбачыць у піцэрыі Pizza Hut (буйная амэрыканская сетка піцэрый, раскіданых па ўсім сьвеце ).

«Дзякуючы яму мы можам дайсьці да канца гэтай піццы» - кажа адзін зь герояў рэклямнага роліку, сьцьвярджаючы, што капіталізм лепш за камунізм. Ролік быў прэзэнтаваны ў 1997.

Тады шмат хто ацаніў гэткі крок палітыка як ніжэйшую кропку ў ягонай кар’еры. Але сам Гарбачоў так не лічыў. Ён пагадзіўся зьняцца ў рэкляме, каб зарабіць грошаў для свайго фонду: ён ствараў бібліятэку і архіў перабудовы, а гэта патрабавала істотных сродкаў. Па ягоных словах:

«Піца – адмысловая страва, яна аб'ядноўвае людзей. Гэта істотная частка жыцьця. Ня толькі спажываньне, а яшчэ і сацыялізацыя.»

Тады Гарбачоў запэўніў, што больш не плянуе здымацца ў рэкляме.