Ніводзін беларускі ўнівэрсытэт ня трапіў у сьпіс 400 лепшых ВНУ Эўропы

Times Higher Education апублікаваў рэйтынг 400 лепшых унівэрсытэтаў сьвету і Эўропы, а таксама 100 ВНУ з найлепшай рэпутацыяй. Як і ў мінулыя гады, беларускім унівэрсытэтам месца ў гэтым сьпісе не знайшлося.

Брытанскі штотыднёвік Times Higher Education, дадатак да газэты Times, і кансалтынгавая кампанія Quacquarelli Symonds ужо шмат гадоў складаюць рэйтынгі сусьветных унівэрсытэтаў. Сёлета Quacquarelli Symonds стварыла ўласны сьпіс, гэтак сама зрабіла і Times, дадаўшы да звычайных рэйтынгаў лепшых паводле цытуемасьці навуковых артыкулаў, колькасьці замежных студэнтаў і якасьці навучальнага асяродзьдзя яшчэ і парамэтар «рэпутацыя».

Атрымалася некалькі асобных сьпісаў: ТОП-100 Times Higher Education унівэрсытэтаў паводле рэпутацыі, ТОП-400 ВНУ у сьвеце і ТОП-400 у кожным рэгіёне плянэты ад таго ж тыднёвіка. Але ў ніводным лісьце беларускіх ВНУ няма.

Шэсьць лепшых унівэрсытэтаў Эўропы ў 2011-2012 гадах паводле Times Higher Education

Гэтак, у рэйтынгу сотні найлепшых унівэрсытэтаў сьвету паводле іх рэпутацыі лідзіруюць ВНУ з ЗША (44 ВНУ з 100) і Вялікабрытанія (10 ВНУ). Сьледам ідуць Японія і Нідэрлянды — ад іх у сьпіс патрапіла па 5 ВНУ. Брытанскія экспэрты адзначаюць, што ў залатой сотні зьявілася больш ВНУ з Азіі — у сьпісе адзначыліся Кітай, Ганконг, Тайвань, Сынгапур і Турцыя. Ніводзін ўнівэрсытэт краін-суседзяў Беларусі, у тым ліку расейскі, у сотню не прашыўся. Сьпіс заснаваны на апытаньнях 17 554 навукоўцаў аб якасьці навучаньня ва ўнівэрсытэтах сьвету.

Затое ёсьць знаёмыя беларусам ВНУ у сьпісе 400 лепшых унівэрсытэтаў Эўропы па вэрсіі ўсё таго ж Times Higher Education. Сярод іх Варшаўскі і Ягелонскі ўнівэрсытэты, а таксама Маскоўскі і Санкт-Пецярбургскі дзяржаўныя ўнівэрсытэты з Расеі. Беларускіх, латышскіх, літоўскіх альбо ўкраінскіх ВНУ у ТОП-400 не прыгадваецца.

Няўдачы штурму сусьветных рэйтынгаў

Новая вэрсія гішпанскага рэйтынгу сайтаў паставіла БДУ на рэкорднае 1208 месца

Некалькі гадоў таму перад беларускімі ўнівэрсытэтамі ўлады паставілі задачу прасоўвацца ў сусьветных рэйтынгах. Посьпеху ў гэтай справе дамагліся толькі ў Беларускім дзяржаўным унівэрсытэце. За апошнія два гады ў рэйтынгу гішпанскай дасьледчыцкай групы, якая стварае сьпіс найлепшых паводле ўнівэрсытэцкіх сайтаў, БДУ узьняўся прыкладна на 500 пазыцый, апынуўшыся ў 2011 годзе на 1208 месцы. У гэтым годзе БДУ упершыню прабіўся ў шостую сотню рэйтынг 700 лепшых унівэрсытэтаў сьвету Quacquarelli Symonds. Той самай арганізацыі, што раней супрацоўнічала з Times.

«У БДУ ёсьць адмысловая група, якая аналізуе гэты рэйтынг, сочыць за тым, якія пазыцыі займаюць нашы калегі зь іншых ВНУ Беларусі», — тлумачыў сакрэт посьпеху ў інтэрвію БелТА рэктар БДУ Сяргей Абламейка.

«У шэрагу іншых сусьветных рэйтынгаў Беларусь трывала замацавалася ў групе найбольш разьвітых краін сьвету» , — заявіў міністар адукацыі Сяргей Маскевіч, падводзячы вынікі 2011 году.

Але, як паказвае сьпіс Times Higher Education, найлепшай беларускай ВНУ яшчэ далёка нават ад чацьвёртай сотні галоўных унівэрсытэтаў Эўропы.

Самі з вусамі

Таму пакуль эўрапейцы высока трымаюць насы і не жадаюць далучаць беларускія ВНУ у свае сьпісы найлепшых, айчынныя адмыслоўцы стварылі ўласны сьпіс лепшых. У ім аказаліся выключна беларускія ўнівэрсытэты.