Марціновіч і Брыль — лепшыя літаратурныя дэбютанты 2011 году
Увечары 14 сакавіка ў Галерэі «Ў» былі названыя ляўрэаты літаратурнай прэміі «Дэбют». Сярод лепшых навічкоў белліту — журналіст расейскамоўнага выданьня Марціновіч, унук пісьменьніка Брыля і цэлы часопіс.
Пераможца ў намінацыі "Пераклад" калектыў часопіса "Прайдзісьвет"
Прэмію «Дэбют» другі год запар даюць у трох катэгорыях: паэзія, проза і пераклад. Найлепшым у перакладах была прызнаная рэдакцыя часопіса «Прайдзісьвет», якая выдала па-беларуску кнігу Эдгара По «Маска чырвонае сьмерці». У намінацыі «Проза» перамагла кніга намесьніка галоўнага рэдактара БелГазеты Віктара Марціновіча «Сьцюдзёны вырай».
Віктар Марціновіч - лепшы малады празаік году
У намінацыі «Паэзія» найлепшай прызналі кнігу Антона-Францішка Брыля «Ня ўпаў жолуд». Аўтар жыве ў Цюрыху, дзе зарабляе на жыцьцё ў IT-сфэры, таму да Менску дабраўся толькі праз відэазварот.
Айцішнік Антон-Фрнацішак Брыль у кампутары
Прэмію «Дэбют» за лепшую кнігу году з 2011 годзе заснавалі Беларускі ПЭН-цэнтар і Саюз беларускіх пісьменьнікаў.
Фундатарам узнагароды выступіў расейскі бізнэсовец зь беларускімі каранямі Павал Бераговіч. У час турэмнага зьняволеньня спадар Бераговіч вырашыў разабрацца ў сваіх каранях і выявіў, што насамрэч ён беларус. Падвучыўшы мову, Бераговіч адправіўся ў Беларусь, упершыню ў жыцьці, дзе спрычыніўся да заснаваньня ўзнагароды для маладых беларускіх пісьменьнікаў, паэтаў і перакладчыкаў.
[Рэпартаж зь мінулагодняга абвяшчэньня ляўрэатаў літаратурнай прэміі «Дэбют» -> усё яшчэ даступны на Generation.bY]
Імпрэзу суправаджаў музыка Лявон Вольскі
Гэтым разам бізнэсовец асабіста прыехаў на цырымонію і сказаў некалькі словаў па-беларуску.
Фундатар прэмі Павал Бераговіч