Ці будзе сёлета Be2gether

У папярэднія гады ўвесну ўжо ішла актыўная рэклямная кампанія фэсту. Большасьць летніх эўрапейскіх фэстываляў цяпер публікуюць праграмы, аднак Be2gether усё яшчэ маўчыць. Мы паспрабавалі разабрацца, ці адбудзецца сёлета каля беларускай мяжы ў Літве пяты фэстываль музыкі і мастацтваў.

Так выглядаў адзін з фэстывальных дзён на апошнім Be2gether

Каб даведацца, што чакаць ад пятага, юбілейнага Be2gether, мы зьвярнуліся да арганізатараў фэсту. Яны пакуль устрымліваюцца ад камэнтароў наконт лёсу фэстывалю. Але ўжо ў бліжэйшыя дні абяцаюць абвясьціць нарэшце, што далей будзе з Be2gether. Галоўнае пытаньне: ці пройдзе фэст у гэтым годзе. Некалькі камэнтароў з гэтай нагоды арганізатары давалі літоўскім СМІ.

«Канчатковага рашэньня, будзе фэстываль ці не, яшчэ няма. Чакаем адказаў пра фінансаваньне», — заявіла на пачатку красавіка агенцыі BNS прэс-сакратарка Be2gether Эгле Рэмэйкайтэ.

Паводле яе словаў, у гэтым годзе арганізатары фэсту не зьвярталіся па фінансаваньне да дзяржаўных структураў, а шукалі грошы толькі ў прыватных спонсараў.

«Мы шукаем іншыя магчымасьці фінансаваньня. І калі спонсар не зьявіцца, фэстывалю ў гэтым годзе ня будзе», — казала Эгле.

Калі ж фэстываль і адбудзецца, то пройдзе ён напрыканцы лета.

«Мы зьбіраемся зрабіць хаця б такі фэст, які быў у мінулых гадах. Нам прапанавалі зьменшыць памер фэстывалю, але мы хочам захаваць якасьць».

Фэстываль Be2gether чатыры гады запар праходзіў на мяжы зь Беларусьсю ля маёнтку вядомага літоўскага бізнэсмэну Гедруса Клімкявічуса. У мінулым годзе яго ўдзельнікамі сталі каля 8 тысячаў чалавек. У найбольш пасьпяховыя гады колькасьць гледачоў дасягала 11 тысячаў.