Міхалок: «Я забаронены, мяне сьцёрлі з матрыцы»

Лідэр «Ляпіса Трубяцкога» Сяргей Міхалок пракамэнтаваў зьяўленьне «сьпісу забароненых» у Беларусі творцаў, у якім гурт Міхалка заняў ганаровае першае месца. На думку музыканта, у сьпіс, з-за якога адмененыя ўжо прынамсі два беларускія канцэрты гурта, трапілі «найбольш годныя людзі плянэты».

У эфіры каналу A-ONE лідэр Ляпіса Трубяцкога Сяргей Міхалок пракамэнтаваў «легенду аб чорным-чорным сьпісе», які «ў чорным-чорным кабінэце намалявала чорная-чорная рука». На думку Міхалка, у сьпіс трапілі «найбольш годныя людзі плянэты», а самога яго «сьцёрлі з матрыцы».

«Мы даведаліся, што існуе чорны сьпіс, куды акрамя калектываў з роднай Беларусі: гурт N.R.M., гурт „Ляпіс Трубяцкой“, гурт „Палац“, Вайцюшкевіч — трапілі прадстаўнікі расейскай рок-н-рольнай інтэлігенцыі. Ладна там Сід, Ваня Нойз, але і мастадонты року таксама заслужылі няміласьць. Хаця мне падаецца, што многім артыстам варта ганарыцца тым, што ўсімі паважанае, усімі любімае Міністэрства культуры зьвярнула на іх сваю ўвагу».

«Ляпіс Трубяцкой» трапіў у ананімны «сьпіс забароненых» разам з 56 беларускімі і замежнымі музыкамі, пісьменьнікамі і акторамі. Упершыню пра ліст стала вядома праз сацыяльныя сеткі. Хаця яго існаваньне і адмаўляюць беларускія ўлады, за апошні тыдзень стала вядома пра адмену 5 канцэртаў музыкаў са сьпісу.

«Гэты чорны сьпіс стаў вельмі вядомы ў так званай блогасфэры. І некаторыя прадстаўнікі міністэрстваў і ведамстваў Беларусі сталі яго адмаўляць, што яго нехта выдумаў, што гэта нейкія хворыя вясеньнія фантазіі. Але з гуртом „Ляпіс Трубяцкой“ пачалі адбывацца нейкія цудоўныя рэчы», — распавядае Міхалок.

«Мы зьніклі з радараў-эфіраў нашых радыёстанцый. Песьні ў нас папсовыя, мэлёдыі — прыгожыя, тэксты — адхіленыя. Мы сьпяваем выключна пра любоў, пра восень, пра ручайкі, пра матылькоў».

У нядзелю не адбыўся канцэрт «Ляпісаў» у Гомелі, гледзячы па ўсім, адменены будзе і выступ у Магілёве (у клюбе, дзе меўся адбыцца канцэрт, пацёк дах — цяпер прадусары шукаюць новую пляцоўку). Пад пагрозай два вялікіх менскіх шоў. Аднак Міхалок турбуецца не за свой лёс, а за сваякоў іншых пэрсанажаў сьпісу:

«Я вельмі перажываю за дзяцей Джуда Лоў, за жонку Кэвіна Спэйсі. Як цяпер яны будуць жыць? Іх усіх забаранілі, нейкай чароўнай чорнай палачкай чарадзей зь Міністэрства культуры Рэспублікі Беларусі пераехаў камбайнам, раздавіў сваім уладным ботам увесь лёс столькіх цікавых людзей. Усе ў паніцы разьбягаюцца: матулі плачуць, дзеці ў сьлязах».

«Гэта ўсё вельмі сур’ёзна», — дадае Міхалок бязь цені ўсьмешкі.