Літва адмаўляецца ад будаўніцтва АЭС

Новая ўлада ў Літве больш крытычна ставіцца да плянаў будаўніцтва АЭС на сваёй тэрыторыі. У канцы мінулага тыдня новы прэзыдэнт Літвы Даля Грыбаўскайтэ дала зразумець: АЭС у некалькіх дзесятках кілямэтрах ад Беларусі, якая мусіць замяніць Ігналінскую станцыю, магчыма, ніколі ня будзе пабудаваная. Рэзкая зьмена атамных плянаў суседняй краіны хавае яшчэ адзін аргумэнт беларускага ўраду на карысьць будаўніцтва АЭС на Астравеччыне.

Па словах спадарыні Грыбаўскайтэ, калі праект занадта дарагі, таньней будзе купляць электраэнэргію на сусьветным рынку. Пачынаючы з 1 студзеня 2010 г., калі Літва выведзе з эксплёатацыі другі блёк Ігналінскай АЭС, аб’ём гэтых закупак складзе 35% з наступным яго павелічэньнем. Ліквідаваць літоўскі энэргадэфіцыт прыйдзецца, верагодна, расейскай энэргіяй.

Праект будаўніцтва АЭС у Літве. Малюнак з сайта vae.lt

Праект будаўніцтва новай АЭС магутнасьцю 3,2 тыс. Мвт ацэньваецца ў €22 млрд. Згодна з папярэднімі дамоўленасьцямі, затраты на будаўніцтва мусілі падзяліць паміж сабой суседзі Літвы ў абмен на долю ў АЭС: Польшча, Эстонія і Латвія. Фінансавая дапамога ЭЗ для гэтага праекту склала б толькі €175 млн. Плянавалася, што новая АЭС будзе пабудаваная да 2015 году, але перамовы аб удзеле партнэраў у праекце зайшлі ў тупік.

У пошуках альтэрнатывы Латвія вырашыла зрабіць стаўку на разьвіцьцё існуючага на Даўгаве каскаду гідраэлектрастанцый, а ў 2008 году вырашыла ўзьвесьці дзьве цеплавыя станцыі. Эстонія ж пачала працу над праектам будаўніцтва АЭС малой магутнасьці ў 335 Мвт на базе японска-амэрыканскага рэактару Toshiba-Westinghouse (сканчэньне прац у 2020 годзе) і выказала цікавасьць да ўдзелу ў будаўніцтве атамнага энэргаблёку на тэрыторыі Фінляндыі.

Нагадаем, што пляны будаўніцтва новай АЭС у Літве былі адным з аргумэнтаў прыхільнікаў такога будаўніцтва ў Беларусі. «Калі яны будуюць, чаму ж нам нельга?» — такі пасыл можна было пачуць і раней. Але, як высьвятляецца цяпер, Літва ня толькі адмаўляецца ад уласнай атамнай станцыі, але яшчэ і занепакоеная беларускім праектам.

Паводле «Коммерсантъ»

Андрэй Сьмятаньнікаў 21:15, 31/07/2009 | Навіны |

Каментары праз FACEBOOK