Міжнародныя творчыя майстэрні be2gether шукаюць удзельнікаў

4-13 жніўня на тэрыторыі Нарвілішскага замка ў Літве пройдуць міжнародныя творчыя майстэрні. Працы нетрадыцыйнага выгляду, створаныя падчас майстэрняў, будуць прадстаўленыя на музычным фэсьце Be2gether. Арганізатары прапануюць далучыцца маладым творцам і прафэсіяналам. ­

Творчыя майстэрні 

Удзельнікі майстэрняў – прадстаўнікі трох розных пакаленьняў, якія валодаюць розным творчым досьведам: дзеці, зь яшчэ зусім неабмежаванай фантазіяй, маладыя, але дасьведчаныя майстры, і прафэсіяналы. Для ўдзелу ў гэтым экспэрымэньце запрошаныя ўмельцы з розных галінаў мастацтва ды розных краінаў: Літвы, Беларусі, Польшчы, Украіны і іншых.

Маладыя прадстаўнікі мастацтва (16-28 гадоў) запрашаюцца для стварэньня візуальнай творчасьці – інсталяцыяў зь нетрадыцыйных матэрыялаў, фільмаў, фатаздымкаў, малюнкаў, акцыяў флэшмобаў, флюксус і іншых прадуктаў, якія дазволіць увасобіць іх фантазія.

Побач з моладзьдзю будуць працаваць прафэсіяналы, чые творы будуць аб’ядноўваць у сабе сынтэз музыкі і формы. Будуць стварацца драўляныя скульптуры, галоўная ідэя якіх – магчымасьць гучаньня на ветры, пад дакрананьнем чалавека або ў штучна створаным асяродзьдзі.

Самыя маленькія ўдзельнікі майстэрняў (7-10 гадоў) далучацца да працы за чатыры дні да пачатку фэсту. Мэта іх удзелу – стварыць арыгінальныя творы мастацтва, якія адлюстроўвалі б ідэю сумеснага знаходжаньня.

Майстэрні не абмяжуюцца толькі творчымі працэсамі. Падчас лягера будуць праходзіць разнастайныя дыскусіі, вечары прэзэнтацый народаў і дзяржаваў, сустрэчы зь вядомымі людзьмі, палітыкамі, музыкамі.

Што трэба для ўдзелу:

• валодаць досьведам працы ў творчай галіне;
• знайсьці час запоўніць анкету;
• шчыра адказаць на пытаньні анкеты, усьведамляючы, што менавіта па адказах будуць адбіраць удзельнікаў;
• анкету даслаць арганізатарам майстэрняў па эл. пошце workshop@b2G.lt або замоўленым лістом па адрасе вул. А Сьмятоны 5, 304 каб. LT-01115, Вільнюс, Літва (з пазнакай: адрасавана – на адбор удзельнікаў творчых майстэрняў B2G)
• заплянаваць 4-13 жніўня для майстэрняў, а 14-17 – для фэсту «Be2gether»
• пасьпець даслаць анкету да 23-й гадзіны 1 чэрвеня 2008 году
• верыць, што мастацтва адчыняе межы

Be2gether 2008

Музычны фэстываль Be2gether 2008 пройдзе 14-17 жніўня ў Літве — у 50 мэтрах ад беларускай мяжы. У мінулым годзе фэстываль прайшоў упершыню, але зь вялікім маштабам. Лёзунг «Музыка разбурае межы» сабраў на некалькіх сцэнах каля 30 гуртоў з многіх краінаў сьвету, у тым ліку і Беларусі. Але арганізатары назвалі мінулы фэст усяго толькі рэпэтыцыяй і сёлета абяцаюць яшчэ большы размах. Вядома, што вядуцца перамовы з Metallica і іншымі гуртамі сусьветнай вядомасьці.