Сёньня - Міжнародны Дзень Ляўшэй

«Мы круцейшыя за праўшэй! Мы - тыя дзесяць адсоткаў, што вылучаюцца з натоўпу!», - сьпяваюць у сваім гімне ляўшы. А ва ўсім сьвеце сёньня зьвяртаюць увагу на праблемы «леварукага» жыцьця.

13 жніўня 1992 года Клюб ляўшэй распачаў сьвяткаваньне Міжнароднага Дня Ляўшэй. Гэтым днём ва ўсіх кутках сьвету ляўшы адзначаюць сваю непаўторнасьць і непадобнасьць, а таксама прыцягваюць увагу грамадзтва да сваіх праблемаў, распавядаюць аб плюсах і мінусах «леварукага» жыцьця.

Напрыклад, у Вялікабрытаніі праходзяць дзесяткі рэгіянальных мерапрыемстваў, такіх як спартовыя спаборніцтвы ляўшэй і праўшэй, леварукія гарбатныя вечарыны, у пабах бутэлькі адкаркоўваюцца левай рукой і гэтак далей. А галоўнае, у так званых «Левых зонах» можна пазнаёміцца з крэатыўнасьцю ляўшэй, зь іх здольнасьцю прызвычайвацца, зь іх гераізмам. Праўшы могуць паспрабаваць скарыстацца рознымі штодзённымі прадметамі, якія зроблены адмыслова для ляўшэй. Такім чынам, праўшы разумеюць, колькі праблемаў у ляўшэй з выкарыстаньнем нават самых простых рэчаў.

У ляўшэй ёсьць свой гімн, такая своеасаблівая скарга і ў той жа час падкрэсьліваньне сваёй перавагі. Ён пачынаецца словамі:

«Вось гісторыя майго жыцьця,
Хай сабе і вясёлага, але поўнага барацьбы
Толькі таму, што я нарадзіўся ляўшой.
Але я ганаруся быць часткаю эліты,
Мы круцейшыя за праўшэй,
Мы – тыя 10 адсоткаў,
Што вылучаюцца з натоўпу!»

А ў рэфрэне ляўшы запэўніваюць, што калі б праўшы прайшлі праз усі іхнія пакуты, яны таксама б адчувалі сваю перавагу.

На жаль, у нас гэта сьвята не адзначаецца. Але кожны праўша можа сёньня паспрабаваць рабіць усё левай рукой. Усё, усё!

Напрыклад, пагуляць у більярд. Гісторыя ляўшэй, вядомыя «леварукія» асобы – у матэрыяле Касі Сарокінай, якая на сабе адчувае «цяжкі» лёс ляўшы: быць непадобнай да астатніх :)

Таксама можна зайсьці на сайт Клюбу Ляўшэй. Там шмат цікавай інфармацыі. Можна прайсьці тэст і даведацца, наколькі ты «левый».

А мы віншуем усіх ляўшэй!