Яўген Бузоўскі схадзіў на канцэрт Napalm Death у Менску, дзе сабраліся аматары растаптаць сваю агрэсію на танцполе. Пад вострапалітычныя матывы агрэсіўных адэптаў здаровага ладу жыцця з Вялікабрытаніі Яўген разважае пра выбар. Які адбываецца пакуль зоркі свецяць усё гэтак жа прафесійна, а мы расцем, танчым, жэнімся, співаемся, або наадварот — назаўжды «завязваем».

Менск наведалі пачынальнікі грайндкору і экстрэмальнага хэві-мэталу брытанцы Napalm Death. Утвораны ў Бірмінгеме ў 1982 годзе на сёньня гурт зьяўляецца легендай у сьвеце жорсткай музыкі. Камандзе належыць рэкорд хуткасьці ўдарных — 20 удараў у сэкунду, а адна зь песень занесеная ў «Кнігу рэкордаў Гінэса» як самая кароткая ў сьвеце — яе працягласьць усяго 1,3 сэк. У менскім «Рэактары» было людна: татуяваныя даўгавалосыя мэталісты сьцякаліся кампаніямі павітаць куміраў юнацтва, фэны-падлеткі займалі стратэгічныя пазыцыі пад сцэнаю для экстрэмальнага стэйдж-дайвінгу.