Калі б у Расеі існавалі ўласныя чорныя сьпісы забароненых музыкаў, ціхі інтэлігент Вася Абломаў, аўтарытэтны як на зоне, гэтак і сярод расейскіх лібэралаў, стаў бы адным зь першых кандыдатаў на тое, каб трапіць у іх. Музыка яшчэ раз даказаў тое, прыехаўшы ў Беларусь і вывучыўшы тут адно-адзінае словазлучэньне па-беларуску. Затое якое! Вася Абломаў вярнуўся ў Маскву, паўтараючы «Жыве Беларусь».

Лідар тыповай шэрай рускай брыт-поп групы раптам напісаў песьню, якую слухаюць мільёны. Яна гучыць на ТВ, з айфонаў хіпстэраў ды мабілаў браткоў. Рэцэпт папулярнасьці аказаўся няхітрым. Варта было дадаць у тэкст слова «Магадан» і трошку адпаведнай музычнай атрыбутыкі.