Акадэмія экстрыму: сноўбордам па вясне
Тым часам як градус суму па заблукаўшай вясне толькі накаляецца, два сябры Рома і Ігар наадварот – радуюцца снегу, і зацяжную зіму перавялі сабе на карысць. У канцы лютага апантаныя сноўбордам хлопцы вырашылі дзяліцца сваім хобі і з іншымі, трэніруючы пачаткоўцаў асновам фрыстайлу. Пакуль за гарбату і шашлыкі, аднак назоў такое хобі атрымала амбітны – Акадэмія экстрыму. Generation.by выправіўся з першымі вучнямі на трэніроўку ў парк на ўсходзе Менску.
Арганізуе заняткі той самы Рома Андрыянаў, які паралельна з’яўляецца адным з заснавальнікаў і выкладчыкаў праекту course.by. Дапамагае яму ў гэтай адказнай і вясёлай справе Ігар Гайдукоў. Для хлопцаў сноўбордынг гэта адзін з галоўных заняткаў у жыцці.
Рома Андрыянаў катаецца ўжо тры гады, але марыў пра сноўборд з 13 год. Перад тым, як арганізаваць уласныя трэніроўкі, думаў папрацаваць інструктарам ва ўкраінскім горна-лыжным курорце ў Букавелі ці ў Сілічах. Але там было шмат усялякай бюракратыі, таму не пайшоў. Пазней ён пабачыў яшчэ адну сноўборд-школу ў Менску, дзе выкладаюць лепшыя сноўбардысты Беларусі:
«Я паглядзеў, чаму яны вучаць — гэтым базавым трукам, якія я ўжо даўно раблю. Тут я і падумаў: О, крута! А чаму б мне не вучыць людзей. Тым больш сноўборд — адна з самых любімых справаў, якімі я займаюся. Я падумаў, што крута было б сумясціць не проста забаўку, а яшчэ і вучыць людзей, за што і грошы нейкія мінімальныя можна атрымліваць. — тлумачыць Рома. — Хоць грошы мы яшчэ не атрымліваем [смяецца]. Хацелася проста арганізаваць гэта ўсё і паспрабаваць».
Другі заснавальнік Экстрым акадэміі Ігар Гайдукоў у мінулым годзе скончыў БДУІР, цяпер адпрацоўвае размеркаванне там жа і навучаецца ў магістратуры. Акрамя сноўборда яго цікавіць музыка – грае на бас-гітары. На сноўборд стаў 6 год таму. Пакрысе пачаў укатваць на дошцы, але на больш высокім узроўні катае трэці сезон. Ідэя замуціць «акадэмію» з’явілася раптоўна:
«Каталіся з Ромам разам у парку. Прыходзілі, спрабавалі нешта новае: ляпілі новыя трампліны, шукалі новыя месцы. Пасля Рома падкінуў ідэю – чаму б не зрабіць справу карыснай, і ўвогуле больш масавай. Прапанаваў ідэю з Экстрым Акадэміяй. За дзень да заняткаў мы прыйшлі, зрабілі ўсе трампліны – на трэніроўцы было крута!»
«І я адзін баяўся гэта рабіць, няма ў мяне імя ў Беларусі, як сноўбардыста. Таму я прыцягнуў дзяўчыну са зборнай Беларусі. Выставіў яе прома-ролікі. Яна прыйшла на першы занятак, які цалкам арганізаваў і правёў я. Тады і з’явілася ўпэўненасць», – дадае Раман.
Цяпер хлопцы з зацікаўленымі пачаткоўцамі збіраюцца ў фармаце «Акадэміі экстрыму» — заняткі па выходных, дзе вучаць асновам фрыстайлу: базавыя скокі, з трампліна ды іншыя крутыя штукі. Мяккага снегу ў парку хапае, што ратуе пачаткоўцаў ад магчымых траўмаў. Таксама там ёсць вельмі рукасты Ігар, які будуе добрыя кікеры. Праўда, часам яму даводзіцца і паваяваць — з мясцовымі дзецьмі, бо ён укладае сілы ў пабудову трамплінаў, а яны наадварот — кідаюць усе высілкі на іх знішчэнне. За ўдзел у трэніроўцы трэба ашчадзіць 70 тысяч беларускіх рублёў. Частка грошай ідзе на харчаванне, бо трэніроўка на ўвесь дзень. Таму хлопцы клапоцяцца пра ежу, арганізоўваюць шашлык.
Пакуль зіма трымаецца, і снег дае магчымасць трэніравацца. Але лета ўжо не за гарамі, і хлопцы плануюць працягваць дзейнасць і займацца таксама нечым экстрэмальным: ці батутамі, ці роварамі, ці скейтамі. Раскрываюць нам канцэпт наступнай ідэі – батут на адкрытым паветры:
«Ёсць гумавы борд, які прышпільваеш і трэніруеш на батуце. Праўда, у Беларусі такі я яшчэ не бачыў ніколі, менавіта нефармальных батутаў. Ёсць батут у залі, як на трэніроўцы, — кажа Рома. — Батут каштуе каля 200 эўра, мы плануем свае грошы ўкласці, і думаем, што ён акупіцца».
Уражаннямі з Generation.by дзеляцца першыя вучні.
«Весела і прадуктыўна! Дзякуй настаўнікам за цярпенне і ўвагу! Прычым займаліся амаль да 20 гадзін замест 18, настолькі хутка праляцеў час, што ніхто нават не заўважыў. Прагрэс быў такі адчувальны, што хочацца ўкочваць і ўкочваць», — эмацыйна распавядае Зміцер Грышук.
«Было вельмі крута! Я атрымала масу станоўчых эмоцый, снегу ў твар і вялікую колькасць каштоўных парадаў, выпраўлення памылак, і досведу! Хачу яшчэ!» — дадае Наста Малдаванава.
Стаць студэнтам новастворанай «акадэміі» можна праз запіс на занятак у суполцы.
* * *
