Стваральнікі бясплатных IT-курсаў у БДУІР: працаваць варта на сябе

Цягам ўжо пяці месяцаў у сценах БДУІР праходзяць бясплатныя адукацыйныя курсы па найбольш папулярных кірунках праграмавання. Аўтарамі ідэі і рэалізацыі праекту пад назовам course.by выступілі два студэнты гэтага ж універсітэту, якія ў пэўны момант адмовіліся ад працы на буйныя карпарацыі і вырашылі, што самы час ствараць сваё. Гэтую ідэю яны цяпер прасоўваюць сярод дзясяткаў слухачоў сваіх курсаў, якія праводзяцца ў бізнес-інкубатары БДУІР.

Філіп Дайнэка

Адзін з стваральнікаў бясплатнага адукацыйнага праекту course.by Філіп Дайнэка. Зараз навучаецца на 5 курсе Беларускага дзяржаўнага ўніверсітэту інфарматыкі і радыёэлектронікі. Працаваць пачаў на другім курсе. Але ўжо ў гэты час з'явілася жаданне ствараць нешта ўласнае і карыснае. Пачаў шукаць сябе і кінуў працу, бо зразумеў, што марнуе час. Зганяў у Штаты – вярнуўся:

«Дзесьці на шляху зразумеў, што Беларусі не будзе без беларускай мовы. Ужо троху больш за год размаўляю па-беларуску», – распавядае Generation.by Філіп. Выкладанне на курсах для Філіпа – магчымасць давесці ідэю свабоды, якую дае прафесія праграміста, і, натуральна, прасоўванне беларускай мовы.

Рома Андрыянаў

Іншы трэнер курсаў, Рома Андрыянаў, працаваў пэўны час у ІТ-кампаніі, зарабляў нямала. Надакучыла. Зараз імкнецца да дзейнасці, якая прыносіць асалоду, бо лічыць, што толькі так можна выкарыстоўваць свой патэнцыял:

«Шчасце – займацца любімай справай, і няхай яна цябе яшчэ і корміць», – усміхаецца Раман.

У course.by для Рамана важна самарэалілзацыя як асобы.

«Пачыналася ўсё вельмі сумбурна, не было гатовай ідэі. Мы прыйшлі ў дэканат, і сказалі, што хочам займацца справай, – узгадвае Рома. – Зараз асноўная філасофія курсу – рабіць штосьці сваё».

Ад пачатку ў хлопцаў не было нейкіх канкрэтных мэтаў. Усё разуменне і ўнутранае адчуванне справы прыйшло з цягам часу:

«Ты сам унутры не такі, ты не верыш у тое, што правільна рыхтаваць людзей і прадаваць іх кампаніі. Мы самі не верым у тое, што трэба ісці працаваць на кагосьці. Таму што прафесія праграміста дае шмат магчымасцяў ствараць што заўгодна», – разважае Філіп.

На працягу ўсіх пяці месяцаў курсы карыстаюцца вялікім попытам, і маюць сталых наведвальнікаў. Збольшага гэта студэнты БДУІР, але наведваюць course.by і школьнікі, і людзі больш сталага ўзросту. Тут можна атрымаць веды па такіх кірунках як Web-design, Javascript, тэставанне ПЗ, HTML5. Вядуць заняткі ў бізнес-інкубатары БДУІР пяцёра выкладчыкаў, два з якіх (Рома і Філіп) выкладаюць па-беларуску. А з 1 красавіка ў Інкубатары стартуе першы набор на новы курс UNIX and GNU/Linux з яшчэ адным беларускамоўным выкладчыкам.

Па ходу заняткаў адбыліся змены: цяпер акрамя навучання пачалі практыкаваць стартап-гарбату, дзе наведвальнікі могуць падзяліцца сваімі ідэямі ды зацікавіць іншых удзельнікаў сваімі праектамі, каб працаваць і рабіць выніковы прадукт камандай.

«Яшчэ адна мэта course.by – стварыць нейкі карысны праект пасьля заканчэння. Каб кожны, хто наведвае заняткі, штосьці сапраўднае зрабіў», – кажа Філіп.

Курсы дагэтуль адкрытыя для ўсіх. Каб трапіць на іх, дастаткова зайсці на сайт праекту і выбраць тое, што падабаецца найбольш.


Фотаздымкі: Юля Fox


Юля Сакалоўская 12:38, 31.03.2013 | Y Business |




Камэнтары праз FACEBOOK



 
In 0.1344 seconds.