Ідэолагі зацікавіліся арыфметыкай дыктатуры
Фільм іранскага рэжысёра «2+2», які пакажуць у Менску ў межах Манхэтэнскага фестывалю кіно, зацікавіў ідэалагічных супрацоўнікаў. Яны запатрабавалі ў арганізатараў фэсту фільм для экспертызы.
«Ідэолагі патрабавалі паглядзець [фільм], напэўна, пабаяліся. Але цяпер непаразуменне вырашылася, фестываль адбудзецца, і фільм „2+2“ таксама будзе паказаны», — паведаміла Generation.bY дырэктарка кінатэатру «Аўтакіно» Ала Куркуль, што арганізуе фэст.
Паводле словаў Алы Куркуль, ідэолагаў напужала анатацыя фільму «2+2», у якой прыгадваліся такія з’явы, як «дыктатура» і «тыранія». Цікаўнасць чыноўнікаў да гэтай стужкі паставіла пад пагрозу паказ усіх фільмаў фестывалю.
Пра што фільм «2+2»?
На ўроку матэматыкі вучні даведваюцца, што два плюс два — пяць. Сцвярджаць іншае — злачынства. Фільм распавядае пра супраціў дыктатуры.
Рэжысёр: Бабак АнварыВытворчасць: Вялікабрытанія
Стужку пакажуць у Палацы культуры і спорту чыгуначнікаў (Менск, вул. Чкалава, 7).
- 29–30 верасня ў 17.00,
- 2 кастрычніка ў 19.00,
- 6–7 кастрычніка ў 17.00.