Мінадукацыі абяцае разьмясьціць велапаркоўкі ля ўсіх ВНУ

Міністар адукацыі Сяргей Маскевіч паабяцаў паступова абсталяваць кожны корпус і інтэрнат усіх ВНУ краіны роварнымі паркоўкамі.

Міністар адукацыі Сяргей Маскевіч паведаміў, што ўстановамі вышэйшай адукацыі ажыцьцяўляецца паэтапнае абсталяваньне парковак для ровараў ля ўваходаў у навучальныя карпусы і інтэрнаты. Заява Маскевіча зьявілася ў выніку звароту арганізацыі «Наш Дом» да дэпутатаў Палаты прадстаўнікоў.

Цяпер роварныя паркоўкі можна знайсьці ля некаторых карпусоў і інтэрнатаў у Беларускім дзяржаўным унівэрсытэце, Менскім дзяржаўным вышэйшым радыётэхнічным каледжы, Беларуска-расейскім унівэрсытэце, Гомельскім дзяржаўным тэхнічным унівэрсытэце, Брэсцкім дзяржаўным унівэрсытэце і іншых ВНУ.

Тым часам першы велагараж ужо зьявіўся ў Менску ў Парку высокіх тэхналёгій на Купрэвіча, 1/1. Фота "БелаВела: пра ровары — па-беларуску"

Паводле інфармацыі «Наш Дом», ва ўстановах вышэйшай адукацыі ўжо распрацаваныя пляны па абсталяваньню роварных парковак.

Цяпер гомельскія студэнты дамагаюцца ўсталяваньня парковак ля ўсіх ВНУ гораду.