Міністар адукацыі паабяцаў прыватным ВНУ «праблемы»

У 2012 годзе першакурсьнікаў будзе не хапаць. Найперш прыватным ВНУ.

Сяргей Маскевіч. Фота БелТА

Міністар адукацыі Сяргей Маскевіч прызнаў скарачэньне колькасьці абітурыентаў і зьмяншэньне набору ва ўнівэрсытэтах краіны. Пры гэтым ён заявіў, што найбольшы недахоп абітурыентаў мусяць адчуць прыватныя ВНУ:

«Я думаю, што ў прыватных вышэйшых навучальных установах будуць прыкметныя праблемы. У гэтым годзе першакурсьнікаў будзе менш, чым у мінулым. Гэта зьвязана з тым, што і выпускнікоў менш», — заявіў міністар падчас прамой тэлефоннай лініі газэты «Рэспубліка».

«Пры ўсім жаданьні ўключыць у ВНУ выпускнікоў каледжаў, сярэдніх спэцыяльных навучальных устаноў і г.д. мы ўсё роўна будзем мець меншую колькасьць першакурсьнікаў», — сказаў Маскевіч, дадаўшы, што не апошнюю ролю ў недаборы студэнтаў згуляе мінімальны станоўчы бал ЦТ.

Таксама міністар абвясьціў пераход вышэйшай адукацыі ў «рэаліі рынку», дзе, як вядома, перавагу мае той, «у каго лепшая якасьць, ніжэйшая цана, словам, хто зацікавіць абітурыента».

Колькасьць абітурыентаў-2012

Па дадзеных Мінадукацыі, у бягучым годзе 11-я клясы ў Беларусі скончаць 63 818 чалавек (у мінулым годзе выпускнікоў 11-клясаў было 75 603).

З улікам таго, што палову абітурыентаў складаюць выпускнікі мінулых гадоў, якія скончылі прафэсійна-тэхнічныя і сярэднія спэцыяльныя навучальныя ўстановы, то агулам скараць ВНУ сёлета будуць каля 128 тысячаў чалавек. У мінулым годзе такіх было 150 175 чалавек.