Міністар абароны ня хоча адмаўляцца ад прызыву ў войска

Міністар абароны Беларусі Юры Жадобін выказаўся супраць пераходу беларускага войску на кантрактную службу. І распавёў, чаму прызыўнікі сталі хварэць у два разы меней.

Міністар абароны Юры Жадобін чакае прызыўнікоў

Паводле словаў міністра абароны, Беларусь ніколі не адмовіцца ад тэрміновай службы, перадае БелТА.

«Мы рыхтуем мужчынскае насельніцтва ня толькі з пункту гледжаньня авалоданьня ваеннай спэцыяльнасьцю. Мы выхоўваем патрыятызм, гатоўнасьць і жаданьне абараняць сваю краіну», — заявіў міністар.

«У гэтым сэнсе падрыхтоўка прызыўнікоў зьяўляецца асабліва істотнай».

Акрамя Беларусі адмаўляцца ад прызыву не зьбіраюцца яшчэ 11 краін Эўропы. Нядаўна прэм’ер-міністар Расеі Ўладзімір Пуцін, які цяпер балятуецца на пасаду прэзыдэнта, заявіў аб жаданьні падвысіць прэстыж тэрміновай службы. Але аб пераходзе на кантрактную службу ў гэтай краіне мова не ідзе.

Чырвоным пазначаныя краіны, дзе дагэтуль існуе прызыў у войска. Аранжавым - краіны, дзе адмовіцца ад яго плянуюць цягам 3 гадоў. Зялёным - краіны, дзе войску няма. Схема Wikipedia

Акрамя гэтага, міністар Жадобін пракамэнтаваў зьмену ў тэрмінах прызыву (цяпер у войска ў Беларусі набіраюць увосень і ўвесну). Паводле міністра, у беларускім войску пасьля пераносу тэрмінаў прызыву ўдвая скарацілася колькасьць выпадкаў прастудных захворваньняў.

Гэта тлумачыцца тым, што маладое папаўненьне, якое прыбыла на службу ў лістападзе, пасьпявае адаптавацца да новых умоваў да пачатку моцных халадоў. Акрамя гэтага, у чэрвені маладыя людзі занятыя пытаньнямі навучаньня. Цяпер ім, на думку міністра, стала троху лягчэй — у войску выпускнікоў унівэрсытэтаў цяпер забіраюць толькі ў кастрычніку-лістападзе.