Літоўцы адсьвяткавалі прыход вясны буйнейшым кірмашом «Казюкас»

Рэкордны па колькасьці ўдзельнікаў трохдзённы Кірмаш «Казюкас» прайшоў у Вільні. Кірмаш, які заняў усе галоўныя вуліцы гораду, суправаджаўся карнавальнымі шэсьцямі і тэатральнымі пастаноўкамі. Так літоўцы традыцыйна сустракаюць вясну.

Для недасьведчанай публікі турыстычныя даведнікі апісваюць «Казюкас» як Дзень сьвятога Казіміра альбо «сьвята кветак». Хаця кветкі даўно ўжо не галоўны тавар на гандлёвых вуліцах, набыць хоць мініяцюрны букецік імкнецца кожны. У выніку з кірмашу атрымліваецца нешта сярэдняе паміж нашай вярбовай нядзеляй і гарачкай калядных распродажаў эўрапейскіх супэрмаркетаў.

Сьвяты Казімір, варта адзначыць, вельмі пасьпяхова зьмяшаўся са старажытным паганскім сьвятам прыходу вясны. І вось ужо апошнія чатыры стагодзьдзі горад штогод цешыць віленчукоў гэткай кветкавай мяшанкай, дзе ўсё літаральна затоплена букетамі на любы густ.

Казюкас — сьвята пяшчотных колераў лямцавых кайстраў і капялюшаў з вышытымі на іх сонечкамі і траўкаю. Гэта абавязковыя пернікі-баравікі і кебабы з Трокаў, найсмачнейшае «хатняе» піва ды гарачы пунш. Тут рэдка можна сустрэць фабрычныя вырабы: большасьць таго, што прадаецца на «Казюкасе», робіцца некалькімі людзьмі, ад таго тавар атрымліваецца сапраўды ўнікальным.

Паглядзець, а мо і пакаштаваць гэта багацьце зьбіраецца, падаецца, увесь горад. Сталы гандляроў выстройваюцца на ўсіх галоўных вуліцах Вільні — ад сэйму на праспэкце Гедыміна да Катэдральнай плошчы і далей, уздоўж замкавай вуліцы да гарадзкой ратушы. І ўсё роўна месца ўсім наведвальнікам не хапае: на галоўным праспэкце гораду носа ня ўбіць. І табе нічога не застаецца, як зьліўшыся з натоўпам марудна рухацца па ходніках уздоўж намётаў з таварамі — людзі самі нясуць цябе.

У сёлетнім кірмашы ўдзельнічала рэкордная колькасьць рамесьнікаў — болей за 1 500 чалавек зь усіх літоўскіх правінцый, а таксама іншых краін прыехалі сюды. А вось у беларускіх рамесьнікаў пагандляваць не атрымалася: літоўская амбасада адмовіла ў бясплатных візах, а плаціць па 60 эўра беларусы не пагадзіліся.

Глядзіце ўвесь фотаблог з кірмашу Казюкас