Эўрапарлямэнт: бясплатны Шэнген для беларускіх студэнтаў

Эўрапарлямэнт паўстаў на барацьбу зь візавымі бар'ерамі. Фота Telegraph.co.uk

У часе дэбатаў камітэту міжнародных справаў Эўрапарлямэнту, на якіх разглядалася сытуацыя ў Беларусі, эўрапейскія палітыкі падтрымалі ідэю ўвядзеньня бясплатных шэнгенскіх візаў для беларускіх студэнтаў і зьмяншэньня іх кошту для ўсіх грамадзян.

Палітыкі прапанавалі Эўрапейскаму Зьвязу зьмяніць свае адносіны зь Беларусьсю ў тым ліку праз падтрымку адлічаных студэнтаў і спрашчэньне працэдуры атрыманьня Шэнгенскай візы. Разам з гэтым ЭЗ можа аднавіць візавыя санкцыі супраць беларускіх чыноўнікаў.

Як перадае EUobserver, Польшча і Літва ўжо вырашылі выдаваць нацыянальныя візы беларусам бясплатна. У сумеснай заяве амбасадараў краін ЭЗ у Беларусі прысутнічае заклік да зьмяншэньня кошту аплаты за візы «для студэнтаў, культурных дзеячаў, журналістаў».

За зьмяншэньне і нават адмену платы за візы для студэнтаў і іншых катэгорый грамадзянаў выказаўся на сёньняшнім паседжаньні і сьпікер Эўрапарлямэнту Ежы Бузэк. Ідэю спрашчэньня працэдуры атрыманьня візаў падтрымалі таксама віцэ-міністар замежных спраў Літвы Эвалдас Ігнатавічус і намесьнік старшыні Беларускай асацыяцыі журналістаў Андрэй Аляксандраў. Аб гэтым паведамляе Радыё Свабода.

Як перадае БелаПАН, адзін з самых высокапастаўленых чыноўнікаў ЭЗ, які прысутнічаў на дэбатах, эўракамісар па пытаньнях пашырэньня Штэфан Фюле, прапанаваў аказваць наўпроставую дапамогу беларускім студэнтам, СМІ і НДА. У выніковай заяве ўдзельнікі паседжаньня прапанавалі дапамагаць беларускім студэнтам цераз мэханізм грантаў.

Пазыцыя ЭЗ адносна Беларусі вырашыцца на паседжаньні міністраў замежных спраў 31 студзеня ў Брусэлі.