Эўрапейскія студэнты заступіліся за беларускіх

Лёс зьняволеных беларускіх студэнтаў занепакоіў Эўрапейскі студэнцкі зьвяз (ESU) які аб’ядноўвае мноства студэнцкіх арганізацый кантынэнту. Зьвяз не абмежаваўся агульнымі заявамі пра недапушчальнасьць гвалту і заняўся працай з кожным асобным беларускім унівэрсытэтам. Таксама ESU намякнуў на магчымыя праблемы, якія могуць зьявіцца ў Беларусі з уступленьнем у Балоньскі працэс.

Эўрапейскі студэнцкі зьвяз выступіў з асуджэньнем рэпрэсіўных мэтадаў беларускіх уладаў, у выніку якіх нашы студэнты аказаліся за кратамі. На думку арганізацыі, што прадстаўляе больш за 11 мільёнаў эўрапейскіх студэнтаў, арыштаваныя навучэнцы могуць быць выключаныя з унівэрсытэтаў:

«Пасьля выбараў 2006 года больш за 300 студэнтаў былі адлічаныя з унівэрсытэтаў за ўдзел у акцыях пратэсту. Нас непакоіць тое, што гэта рэпрэсіўная мера будзе наноў ужытая на працягу бліжэйшых тыдняў», — заявіў старшыня ESU Bert Vandenkendelaere.

ESU заклікаў міжнародную супольнасьць тэрмінова пачаць ціснуць на беларускую ўладу каб спыніць арышты і вызваліць зьняволеных студэнтаў. У прыватнасьці, Зьвяз папрасіў эўракамісара па адукацыйных пытаньнях Андрула Васіліу «мабілізаваць краіны ЭЗ для абароны каштоўнасьцяў, на якіх заснаваны гэты саюз».

Таксама ESU нагадаў беларускаму кіраўніцтву, што рэпрэсіі ня надта вітаюцца ў адзінай прасторы вышэйшай адукацыі, часткай якой спрабуе стаць Беларусь. Гэта арганізацыя ўжо разаслала лісты 15 беларускім ВНУ з патрабаваньнем не адлічаць студэнтаў, што былі арыштаваныя 19 сьнежня.

«Мы ўстанем на абарону правоў беларускіх студэнтаў, калі ім не даюць магчымасьці зрабіць гэта самім», — гаворыцца ў звароце Зьвязу, што быў накіраваны на імя міністра адукацыі Беларусі.

Па інфармацыі ініцыятывы «Студэнцкая рада», да акцыі салідарнасьці зь беларусамі далучыліся таксама студэнцкія зьвязы Чэхіі, Аўстрыі, Францыі і Швэйцарыі.