Эўразьвяз абмяркоўвае магчымасьць адмены візавага рэжыму для краін Усходняга Партнэрства

Ужо празь некалькі тыдняў Расея можа атрымаць дарожную мапу для адмены візавага рэжыму з Эўразьвязам. На фоне значнага прагрэсу ў візавых перамовах паміж ЭЗ і Расеяй заходнія суседзі Беларусі заклікаюць адмяніць візавы рэжым для ўсіх краін Усходняга партнэрства адначасова.

Магчымасьць адмены візаў паміж краінамі Эўрапейскага Саюзу і Расеяй пацьвердзіў 9 траўня ў Маскве генэральны сакратар Рады Эўропы Цербьерн Ягланд. Як адзначыў міністар замежных спраў Расеі Сяргей Лаўроў, канкрэтныя даты назваць цяжка, бо справа за прынцыповым рашэньнем.

А сёньня міністры краін ЭЗ замежных спраў заявілі, што існуе высокая верагоднасьць выдачы Расеі дарожнай мапы для адмены візавага рэжыму ўжо ў канцы траўня.

Дарожная мапа — гэта сьпіс рэформаў, якія краіна мусіць правесьці перад адменай візавага рэжыму, такія як увядзеньне біямэтрычных пашпартоў, зьмены заканадаўства ў абароне дадзеных і ўзмацненьне памежнага кантролю. Яна не абавязвае ЭЗ да адмены візавага рэжыму ў нейкі канкрэтны дзень, але прымушае рэагаваць на выкананьне пунктаў дарожнай мапы.

Польшча непакоіцца

Як перадае EUobserver, Польшча заклікае Эўразьвяз не забывацца на шэсьць краінаў-удзельніц праграмы Ўсходняе партнэрства. У гэтай праграме бярэ ўдзел і Беларусь.

«Палітычны імпульс для паскарэньня візавага дыялёгу мусіць быць аднолькавым для ўсіх краінаў — Расеі і шасьці краін Усходняга партнэрства», — заявіў сёньня міністар замежных спраў Польшчы Радэк Сікорскі.

Некалькі дзён таму кіраўнік МЗС Літвы Аўдронюс Ажубаліс таксама выступіў за паскарэньне візавага дыялёгу паміж Усходнім партнэрствам і краінамі ЭЗ. Але, адпаведна зь яго заявамі, Літва выступае за адмену візавага рэжыму толькі з трыма краінамі Партнэрства: Грузіяй, Украінай і Малдовай. Для Беларусі прапануецца толькі спрашчэньне рэжыму.

Грузінскія і ўкраінскія дыпляматы незадаволеныя тым, што грамадзянам Расеі візавае пытаньне вырашыць лягчэй, чым украінцам і грузінам. Украіна яшчэ ў 2005 годзе адмяніла візы для грамадзян ЭЗ, але адчувальнага эфэкту гэта ініцыятыва не дасягнула.

У той жа час шэнгенская віза для расіян і ўкраінцаў каштуе толькі 35 эўра. Беларусам яна як і раней абыходзіцца ў 60.

1 700 тысяч візаў

У 2005, а таксама 2007-2008 гг. толькі амбасады Літвы, Латвіі, Польшчы і Чэхіі выдалі беларускім грамадзянам каля 1 мільёну 700 тысяч візаў. Большасьць візаў былі выдадзеныя польскімі консульствамі — каля 1 мільёну 350 тысяч.

Колькасьць візаў у тысячах, выдадзеных Чэхіяй, Польшчай, Літвой і Латвіяй беларусам ў 2005, 2007 i 2008. Паводле дасьледаваньня фундацыі імя Стэфана Баторыя

З увядзеньнем у 2007 г. шэнгенскіх правілаў у гэтых краінах колькасьць выданых візаў скарацілася ў сярэднім на 40%. Напрыклад, польскі кансулят скараціў выдачу на 73%.