З рэгістрацыі на прафэсійна-псыхалягічныя сумоўі ў Беларусі стартавала ўступная кампанія-2009

Ад сёньня і да заканчэньня сакавіка абітурыенты маюць магчымасьць зарэгістравацца на прафэсійна-псыхалягічнае сумоўе ў беларускія ВНУ. «Прафсумоўе» было ўведзенае ў Беларусі ў мінулым годзе. Яго неабходна прайсьці, каб мець магчымасьць паступаць на тыя ж 10 гуманітарных спэцыяльнасьцяў, што і ў 2008 годзе.

«Хто ваш кумір?» — пыталіся ў патэнцыйных журналістаў на прафсумоўі 2008 году ў БДУ

У гэтым годзе сумоўе будзе адбывацца з 5 па 30 красавіка ў адпаведнасьці з графікамі, якія зацьвярджаюць ВНУ.

Прафэсійна-псыхалягічнае сумоўе неабходна праходзіць для паступленьня ў вышэйшыя навучальныя ўстановы на спэцыяльнасьці

• «дзяржаўнае кіраваньне»,
• «дзяржаўнае кіраваньне і права»,
• «дзяржаўнае кіраваньне і эканоміка»,
• «міжнародныя адносіны»,
• «міжнароднае права»,
• «правазнаўства»,
• «эканамічнае права»,
• «журналістыка»,
•  «міжнародная журналістыка»,
•  «мытнае справа».

У 2008 годзе 140 абітурыентаў з агульнай колькасьці 14132 чалавек не прайшлі прафэсійна-псыхалягічныя сумоўі.